Яңғыҙҡайындар берҙәм эшләй

Эш хаҡы ла туранан-тура етештереүсәнлеккә бәйле. Ни тиклем күберәк һөт һауһалар, һауынсыларҙың эш хаҡы мулыраҡ буласаҡ. Етәксенең һүҙе эштән айырылмауын, вәғәҙәһендә тороуын беләләр, шуға ла тырышып эшләйҙәр.
Яңғыҙҡайын фермаһында 423 баш һыйыр малы, шул иҫәптән 84 баш һауын һыйыры аҫрала. Былтыр йыл һуҙымында ферма буйынса 3799 центнер һөт етештерелеп, дәүләткә 2264 центнер һөт һатылған, 66 быҙау алынған. Бөгөнгө көндә ферма буйынса һәр һыйырҙан көндәлек 6-7 килограмм һөт һауалар. Һауылған һөт нигеҙҙә беренсе сорт менән һатыла. Мал аҙығы йәһәтенән дә зарланырлыҡ түгел, ҡышлатыуға етерлек күләмдә әҙерләнгән, һыйырҙарға иген фуражы, көнөнә ике тапҡыр сенаж, бесән-һалам аралаштырып бирелә. Дөйөмләштереп әйткәндә, малдар те-йешле рацион буйынса бөтә талаптарға ярашлы ашатыла, тәрбиәләнә. Ҡуралар йылы, таҙа, ҡоро, йәй көнө еренә еткереп ремонтланған, тәҙрә-ишектәр, ялан кәртәләр яңыртылған. Был инде ҡышҡа ныҡлы әҙерлек һөҙөмтәһе.
Оҙаҡ йылдар (өс тиҫтә йыл) фермала электрик булып эшләгән Шамил Шәмсетдинов хәҙер мөдир булараҡ тотош фермалағы эш өсөн яуап бирә. 2013 йылдан алып, йәғни етенсе йыл инде берҙәм коллектив менән уңышлы етәкселек итә ул. Ойоштороу һәм эшлеклелек һәләтенә эйә Шамил Мотаһар улы әңгәмә барышында малсылыҡ тармағында эшләп, ҙур тәжрибә туплаған, шулай уҡ яңы хеҙмәт юлын башлаған малсы һәм һауынсыларҙан торған эшкә һәләтле коллективтың барыһы менән дә таныштырҙы. Бөгөн бында 17 кеше эшләй. Һауынсылар Әминә Мусина, Таңсулпан Бергулиева, Айгөл Ғәйнуллина. Һауын һыйырҙарын тәрбиәләүсе малсылар Рәжәп Нафиҡов, Марс Бергулиев, башмаҡтар ҡараусы ағалы-энеле Рәмил менән Ришат Шәриповтар, Рифат Мусин, быҙау ҡараусы Эльвира Ҡадирова, Рау-шания Ғафарова, Ришат менән Рифат Рәхимовтарҙың эшкә яуаплы ҡарауы һөҙөмтәһендә быҙауҙар теремек булып үҫә. Һарайҙағы тиреҫ сығарыу ҡоролмаһы операторы Флүр Уразаев, биналарҙы тиреҫтән таҙартыусы тракторсы-оператор Рәйес Исламғолов, һауыу ҡоролмалары операторы Илдус Халиҡов, фуражсы Азат Ғафаров үҙ эшен еренә еткереп башҡара. Район ветеринария станцияһынан ветеринар хеҙмәткәр Рәсүл Йәрмөхәмәтов малдарҙы даими ҡарап-тикшереп тора. Фермала кәрәкле бөтә дарыуҙар бар, тейешле процедуралар, прививкалар ваҡытында башҡарыла.
Индира ИШКИНА.