Тормош йәме һеҙ, ҡатын-ҡыҙ!

Ҡатын-ҡыҙҙарҙы ҡотлау өсөн тәүге һүҙ район хакимиәте башлығы Фәнзил Сыңғыҙовҡа бирелде. Фәнзил Фәйез улы район хакимиәте һәм район Советы исеменән байрам уңайынан тәбрикләп, ҡатын-ҡыҙҙарҙың ғаилә усағын һаҡлаусы, йәшәйеште дауам итеүсе, матурлыҡтың, яҙ кеүек наҙлылыҡтың кәүҙәләнеше, хеҙмәт урынында алыштырғыһыҙ белгес булыуын билдәләне. “Районыбыҙ ҡатын-ҡыҙҙары араһында ауыр һуғыш йылдарында фиҙаҡәр хеҙмәт өлгөһө күрһәткән, үҙҙәренең нескә иңдәрендә барлыҡ ауырлыҡтарҙы күтәреп, Еңеү көнөн яҡынайтыу өсөн ал-ял белмәй эшләгән ҡатын-ҡыҙ - тыл ветерандары ла бар – улар 62 кеше, улар алдында түбәнселек менән баш эйәм”, - тине Ф.Сыңғыҙов һәм байрам кисәһенең иң түрендә – алғы рәттәрҙә урын алған олпат йәштәге инәйҙәр - тыл хеҙмәтсәндәрен Бөйөк Еңеүҙең 75 йыллыҡ юбилей миҙалдары менән бүләкләне. Район хакимиәте башлығы шулай уҡ районыбыҙҙың төрлө предприятие-ойошмаларында юғары хеҙмәт күрһәткестәренә өлгәшкән ҡатын-ҡыҙҙарға Рәсәй Федерацияһының, Башҡортостан Республикаһының маҡтаулы билдә-исемдәрен (педагогтарға), Маҡтау грамоталарын, район хакимиәте, район Советының Маҡтау ҡағыҙҙарын, Рәхмәт хаттарын һәм, әлбиттә, сәскә гөлләмәләре тапшырҙы.Был көндө сәхнәләге моңло йырҙар, саксофон моңдары, балаларҙың дәртле, сағыу бейеүҙәре ҡатын-ҡыҙҙарға байрам бүләге булды. Кисәне район мәҙәниәт һарайы хеҙмәткәрҙәре Гөлназ Мирхәйҙәрова менән Фәнзил Ғәлин йәмле һәм йәнле итеп алып барҙы.И.ӘЛИБАЕВА.