Ғафуриҙар әүҙем ҡатнашты

Был мөһим сараға “Красноусол коммуналь хужалығы” нан, мәҫәлән, эшселәрҙән тыш 10 берәмек техника, шул иҫәптән ете трактор, тейәгес һәм ике КамАЗ йәлеп ителгән. - Ҡышын беҙ һәр көн ауыл урамдарын ҡарҙан таҙартыу менән мәшғүлбеҙ, ә бына 23 ғинуарҙа төп көстө социаль объекттарҙың биләмәләрен таҙартыуға йәлеп иттек,- ти предприятие етәксеһе.
"Тепловодоснабжение" предприятиеһы хеҙмәткәрҙәре иһә Красноусолдағы күп фатирлы йорттарҙың ҡыйыҡтарын ҡарҙан таҙартҡан.
- Беҙҙең ҡарамаҡта барлығы 25 күп фатирлы йорт иҫәпләнә. Унда йәшәүселәрҙең хәүефһеҙлеген тәьмин итеү, бәлә-ҡазаларға юл ҡуймау маҡсатында предприятие эшселәре даи-ми рәүештә был йорттарҙың ҡыйығын ҡарҙан таҙарта, - ти предприятие етәксеһе С.О. Афанасьев. Фотохәбәрсебеҙ Наил Латипов предприятиеның махсус бригадаһын Фрунзе урамындағы йорттарҙың ҡыйығын таҙартҡан мәлдә фотоға төшөрөп алған.
Көндәр йылытыу менән хәүеф бермә-бер артасаҡ, йорт ҡыйыҡтарынан ҡар ишелеү, боҙбармаҡтарҙың һынып төшөүе ихтимал. Шунлыҡтан урындағы етәкселек халыҡты, айырыуса балаларҙы бындай урындарҙа иғтибарлы һәм һаҡ булырға, хәүефле урындарға ҡуйылған аншлаг, яҙыуҙарҙы урап үтергә саҡыра.