Аныҡ маҡсаттар ҡуйылды

Табын ауыл мәҙәниәт йортонда уҙған осрашыуға халыҡ бик күп йыйылды. Төп доклад - 2020 йылға отчет менән Табын ауыл советы ауыл биләмәһе башлығы Фидан Ғүмәров сығыш яһаны.
Табын ауыл биләмәһенә 10 ауыл ҡарай. 1126 йорт-хужалыҡта 3597 кеше йәшәй. Ауыл хакимиәте үҙ эшен раҫланған планға ярашлы башҡарып сыға. 2020 йылда ауыл Советының 28 ултырышы үткәрелеп, 79 мәсьәлә ҡаралған, 11 норматив-хоҡуҡи акттар ҡабул ителгән. Граждандарҙан 32 яҙма мөрәжәғәт ҡабул ителгән, улар урында ҡаралып, тейешле ҡарарҙар сығарылған. Граждандар нигеҙҙә торлаҡ шарттарын яҡшыртыуға мохтаждар иҫәбенә ҡуйыуҙы һорап мөрәжәғәт иткән, бөгөнгө көнгә биләмә буйынса мохтаждар иҫәбендә 16 ғаилә тора.
Ф.Ф.Ғүмәровтың сығышынан күренеүенсә, 2020 йылда Березовка ауылында балалар майҙансығы урынлаштырылған, көнкүреш ҡалдыҡтары түгеү майҙансыҡтары төҙөкләндерелгән, кон-
тейнерҙар, юл билдәләре һатып алынған, юлдарҙың соҡор-саҡырлы урындарында ямау эштәре башҡарылған, һыу башняһы ремонтланған, яңы скважина ҡаҙылып, яңы насос алынған һәм коммуникациялар уҙғарылған, стела урынлаштырылған, “Аныҡ эштәр” проектына ярашлы, Табын ауылының Кейекбаев урамы ҡоймалары ремонтланған.
Биләмәлә ауыл хужалығы предприя-тиелары байтаҡ ҡына. “Урожай” ЯСЙ-е КХ-һы (үҫемлекселек, малсылыҡ менән шөғөлләнә), “Г.М.Тахтаров” (үҫемлекселек), “Агролэнд” (үҫемлекселек, малсылыҡ), “Агрохим” (үҫемлекселек), “Солнышко” (малсылыҡ, мал һуйыу цехы), “Восход-СТ” ЯСЙ-е АП-һы (үҫемлекселек, ҡошсолоҡ) хужалыҡтары үҙ эшмәкәрлеген алып бара.
Ауыл биләмәһе буйынса һыйыр малдары һаны 788 баш, шуның 340-ы – һауын һыйырҙары, 736 баш һарыҡ-кәзәләр, аттар - 127, сусҡалар - 694, ҡош-ҡорт – 4700, ҡуяндар – 89, 1370 баш умарта күсе аҫрала.
Биләмә башлығы шәхси хужалыҡтарҙа үҙҙәренән артҡан малсылыҡ продукцияһы, ит, бал менән район үҙәгендә, ҡалаларҙа уҙған йәрминкәләрҙә әүҙем ҡатнашып, халыҡты тәьмин итеүселәрҙе лә атап үтте. Улар: Яңы Бурлы ауылынан Мырҙағоловтар, Иманғоловтар ғаиләләре, Табындан Зәниә Шәйәхмәт ҡыҙы Степаненко, Наталья Александровна Мещерякова, Илшат Сәғит улы Ишбулатов, Родина ауылынан Константин Соколов һәм башҡалар. Шулай уҡ фермерҙарыбыҙ Г.М.Тахтаров, М.Ш.Алиян йәрминкәләрҙән бер ҙә ҡалмай.
2020 йылда “Урындағы башланғыстарҙы яҡлау” программаһында ҡатнашып, унан алдағы йылда ошо программа сиктәрендә һатып алынған “МТЗ-82” тракторына тағылмалы-аҫылмалы ҡорамал һатып алғандар. Бөгөнгө көндә был ҡорамал урынлаштырылған трактор урамдарҙы ҡарҙан таҙартыуға, сүп-сар йыйыуға, юлдарҙың соҡор-саҡырын ямау эшенә йәлеп ителә. Быйыл да был программала ҡатнашып, "УАЗ" базаһында янғын һүндереү машинаһы алырға планлаштыралар. Сығыш яһаусы быны биләмәлә янғындарҙың йышайыуы менән аңлатты. Табын ауыл биләмәһендә бер янғын һүндереү машинаһы һәм ике күсермәле һыу насосы бар. Ф.Ғүмәров билдәләүенсә, 2019 йылда нигеҙҙә мунсалар янһа, 2020 йылда иһә 4 йорт көл-күмергә әйләнгән, береһендә кеше ғүмере өҙөлөүе аяныслы, 4 мунса, бер һарай, сүп-сар яныуҙың – 3, үлән яныуҙың – 5, бесән яныуҙың – бер, урман яныуҙың 2 факты теркәлгән. Былтыр декабрҙә Табын ауылының Серов урамындағы йортта сыҡҡан янғында 2008 йылғы бала һәләк булды. Янғын сығыуҙың сәбәптәре төрлө, әммә күпселек осраҡта төп сәбәп булып кешеләрҙең вайымһыҙлығы тора. Электр үткәргестәрҙең иҫке, туҙыу сигенә етеүе, мейестәрҙең төҙөк булмауы, өй, мунса мейестәренә артыҡ күп яғыу, шулай уҡ ут менән һаҡһыҙ эш итеү янғынға сәбәпсе була, тине Фидан Фәнүр улы. Был тәңгәлдә 2020 йылда яңғыҙы йәшәгән 55 һәм өлкәнерәк йәштәгеләрҙең, 7 йәшкә тиклемге балалары булған ғаиләләрҙең йорттарына бушлай 294 янғын иҫкәрткес ҡуйылған.
Демографик хәлгә килгәндә, уҙған йылда тыуым бынан алдағы йылдарға ҡарағанда кәмерәк булған, 24 сабый донъяға килгән, 21 кеше мәрхүм булған. Ауыл биләмәһендә 83 күмәк балалы ғаилә йәшәй, тулы булмаған ғаиләләр һаны – 54. Пандемия сәбәпле 2020 йылда күп балалы, аҙ тәьмин ителгән ғаиләләргә 153 аҙыҡ-түлек йыйылмаһы таратылған. Ноябрҙә 4-тән күберәк балалы ғаиләләргә йәнә аҙыҡ-түлек йыйылмалары тапшырылған.
Быйылға ла күләмле генә эштәр планлаштырылған. Табын ауылындағы Йәштәр, Павловкала Колхоз һәм Йылға, Родинала Пушкин урамдары юлдарын тигеҙләп, күтәртеү күҙаллана. Юл билдәләрен яңыртыу менән шөғөлләнәсәктәр, ә Родина ауылында Тракт, Үҙәк урамдарҙа яңылары барлыҡҡа киләсәк. Балалар майҙансығы һатып алып урынлаштырыу ҡаралған.
-2021 йыл Башҡортостанда Сәләмәтлек һәм әүҙем оҙон ғүмерлелек йылы тип иғлан ителеп, уның сиктәрендә бик күп спорт саралары уҙғарыу планлаштырыла. Балалар ҙа, өлкәндәр ҙә спорт менән дуҫтар. 2020 йылда өлкәндәрҙең футбол командаһына 15000 һумға футбол формалары һатып алынды. Был тәңгәлдә “Берҙәм Рәсәй” сәйәси партияһының район бүлексәһенә, шәхсән район хакимиәте башлығы Ф.Ф.Сыңғыҙовҡа рәхмәт һүҙҙәребеҙҙе еткерәбеҙ, - тине Фидан Ғүмәров сығышын йомғаҡлап.
Биләмә башлығының сығышынан һуң Табын ауыл Советының 9-сы һайлау округы депутаты Г.В.Кузина үҙ эшмәкәрлеге менән таныштырҙы. Район хакимиәтенең административ комиссияһы яуаплы секретары Ю.М.Нәзиров Административ хоҡуҡ боҙоуҙар тураһындағы Кодекстың мөһим йүнәлештәре менән таныштырҙы. “Эко-СИТИ” төбәк операторы вәкиле А.Ҡ.Әлмөхәмәтов бөгөнгө көндә актуаль булған, күптәрҙе борсоған көнкүреш ҡалдыҡтарын йыйыу мәсьәләһенә асыҡлыҡ индерҙе. Район Советы рәйесе – район ветстанцияһы начальнигы Ф.Һ.Зәйнетдинов беҙгә янаған эпидемия - ҡош киҙеүе, сусҡаларҙың Африка тағуны буйынса профилактик мәсьәләләргә туҡталды.
Фидан Ғүмәров биләмә тормошонда әүҙем ҡатнашҡан бер төркөм алдынғыларҙы Табын ауыл хакимиәтенең Рәхмәт хаттары менән бүләкләне.
Ултырыш һуңында район хакимиәте башлығы Фәнзил Сыңғыҙов ҡыҫҡаса райондағы хәл-торош менән таныштырҙы, Табын ауыл биләмәһендә проблемалар күп булыуын һыҙыҡ өҫтөнә алды. Коронавирус әлегә бөтмәүен билдәләне, был сиргә ҡаршы прививка яһатыу мөмкин булы-уын әйтте. Халыҡты борсоған һорауҙарға яуап бирҙе. Һорауҙар араһында Архангел ауылын газ үткәргескә, Әхмәт ауылын Интернетҡа тоташтырыу, был төбәккә юлдар һалыу, Табын ауылында юлдарҙың соҡор-саҡырлы урындарын ямау, берәҙәк эттәр мәсьәләләре булды. Йыйылыш һуңында ҡарар ҡабул ителде һәм ошоноң менән Табын ауыл Советы ауыл биләмәһе Советы депутаттарының асыҡ ултырышы тамамланды.