Бөйөк Хәтер һынауы

Красноусолдағы 2-се мәктәптәге диктант майҙансығына район хакимиәте башлығы Фәнзил Сыңғыҙов, уның урынбаҫарҙары, шулай уҡ муниципаль район Советы рәйесе Фаил Зәйнетдинов, хәрби бәрелештәр ветерандары һәм башҡалар килде.
Күршеләге 1-се мәктәптә лә диктант башланырҙан күпкә алда был мөһим сарала ҡатнашырға теләүселәр йыйылып бөткәйне. Был мәктәптә диктант майҙансыҡтары 5 аудиторияла ойошторолоп, 120-нән ашыу кеше теркәлеү үткәйне.
Беҙ ултырған 5-се аудиторияла мәктәптең педагог-психологы Светлана Абрар ҡыҙы Аралбаева Еңеү диктантының маҡсаты, ҡасандан үткәрелеүе менән таныштырғандан һуң диктант яҙыу тәртибен аңлатты.
Диктант тип аталһа ла, ул һорауҙарға әҙер яуаптар араһынан дөрөҫөн һайлап алыу, йәғни тест рәүешендә, шулай уҡ ҡайһы бер һорауҙарҙың яуабын үҙең белеп яҙыуға ҡоролғайны. 45 минут эсендә 25 һорауға яуап бирергә кәрәк ине. Улар барыһы ла Еңеү тарихы менән ҡыҙыҡһыныуға этәрерлек, элек белеп тә, онотолғандарҙы иҫкә төшөрөрлөк, белмәгәнеңде өйрәнерлек итеп әҙерләнгән.
Был көндө онлайн рәүештә, йәғни махсус сайтҡа инеп, Еңеү диктанты яҙыусылар ҙа күп булды.