Изге эшкә башланғыс

Ғибәҙәттәр ҡылыу өсөн һәр мәхәлләлә мәсеттәр төҙөйҙәр. Сөнки йәмәғәт менән мәсеттә – Аллаһы йортонда ғибәҙәт ҡылыуҙың сауабы күп тапҡырға артыҡ. Ҡыҙғанысҡа ҡаршы, беҙҙең Имәндәш ауылы мосолмандары тиҫтә йылдар буйына мәсет юҡлыҡҡа зарланып йәшәне. Күптән түгел ошо етешһеҙлекте бөтөрөү маҡсатында ауыл сходы йыйылып, һәр йорттан 1 мең һум иғәнә индереп, мәсет төҙөргә ҡарар сығарылды. Аллаһ йортон урмандан диләнкә бүлдереп, ағастан һалырға булдыҡ. Ауылыбыҙҙың ҡулына балта тота алған һәр ир-уҙаманы берәр бүрәнә әрсеп һалһа ла, бер-ике көн бура бурауҙа һәм бура күтәрешеүҙә ҡатнашһа ла оҙайлы сауапҡа эйә буласаҡ. Ә оҙайлы сауап ул, кеше баҡыйлыҡҡа күскәс тә ошо изгелеге өсөн уның ғәмәл дәфтәренә өҫтәлеп тора торған сауап. Ул төҙөшкән мәсеттә ғибәҙәт ҡылған һәр мөьминдең сауаптары уға яҙыла. Ошо хәлде аңлап, шулай уҡ атҡарған эшебеҙҙең изге эш икәненә төшөнөп, мәсетебеҙҙе төҙөүҙә Имәндәштә йәшәгән имандаштарыбыҙ ғына түгел, башҡа ауыл-ҡалаларҙа донъя көткән ауылдаштарыбыҙ ҙа ҡатнашыр тип ышанғы килә.

Тағы ла шуныһы, изге эш башҡарыуға ҡарамай, арабыҙҙа битараф, йә ҡаршы килеүселәр ҙә табылыуы ихтимал. Ундай кешеләргә шуны әйтке килә, теләһә ниндәй уйҙырма, нахаҡ хәбәрҙәре, ялған ялыуҙары менән иманлы эшкә аяҡ салмаһындар ине. Кешенең ысын йөҙө ошондай осраҡтарҙа асыла. Аллаға шөкөр, намыҫлы ауылдаштарыбыҙ хәләл ризыҡ менән туҡланып, барына шөкөр итеп, кеше малына ҡул һуҙмай бәрәкәтле тормошта йәшәйҙәр. Ғөмүмән, ауылыбыҙҙың 140 йортоноң хужалары иғәнәгә аҡса табырҙар, бағыусылар һәм хөкүмәтебеҙ ярҙамы менән изге эшебеҙҙең осона сығырбыҙ тип уйлайбыҙ.