Аҡ күңелле ағинәй

Яңғыҙы ғына йәшәгән Нәүфилә апай һигеҙенсе тиҫтәһен ваҡлауына ҡарамаҫтан, бирешмәй әле, һарыҡтар аҫрап бынамын тигән итеп донъя көтә. Әленән-әле ҡорбан салдырып, ауылдаштарын һыйлай. Ҡорбан ғәйете байрамында ла Имәндәш ауылы хәҙрәте Салауат Түзбәковтан ҡорбанға һарыҡ салдырып, барса халыҡты мәктәпкә йыйып, Ҡөрьән уҡытып, ҡорбан ашынан ауыҙ иттерҙе. Халыҡ күп кенә йыйылды, һәр береһе хәйер таратты, өҫтәл ризыҡ муллығынан һығылып торҙо. Нәүфилә апайҙың Табын ауылында йәшәүсе ҡыҙы Флүрә лә тәмле-томло ризыҡтар бешеренеп килтергән. Имәндәш ауыл биләмәһе башлығы Әхнәф Ноғайғолов, ашнаҡсылар Гөлдәр Кинйәбулатова, Гөлназ Дауытова, Т.Салауатова, мәктәп директоры урынбаҫары Ләйсән Әхтәмова, Айһылыу Амангилдина, ауыл хакимиәте хеҙмәткәрҙәре Фәнилә Хәкимова, Ләлә Хәбибуллина ярҙам ҡулы һуҙҙы. Байрамға килеүселәр рәхмәт әйтеп таралышты.