-15 °С
Ҡар
Антитеррор
Бөтә яңылыҡтар
Мәғариф
26 Апрель 2019, 17:23

Олпат республикабыҙға кескәйҙәр бүләге

Республикабыҙҙың 100 йыллығына һәр ерҙә матур байрам кисәләре үткәрелде. Районыбыҙҙың “Әкиәт” балалар баҡсаһы хеҙмәткәрҙәре лә республикабыҙҙың тыуған көнөнә бәләкәстәр менән берлектә ныҡлы әҙерләнгәндәр. Бында Башҡортостаныбыҙҙа йәшәүсе төрлө милләт халыҡтарының йыр-бейеү-ҙәрен, шағирҙарыбыҙҙың Ватаныбыҙҙы данлаған шиғырҙарын ишетеп, күрергә лә, тарихыбыҙ тураһында мәғлүмәт алырға ла, видео экран аша еребеҙҙең гүзәллегенә һоҡланырға ла, һабантуйҙа ҡатнашып тамаша ҡылырға ла мөмкин ине.

Бында барып кереү менән балаларҙың ихлас, шат йөҙҙәрен күреп, үҙеңде ысын әкиәт донъяһындағы кеүек хис итәһең. Малай-ҡыҙҙар матур кейемдәрен кейеп, байрам башланыуын түҙемһеҙлек менән көтөп йөрөйҙәр. Төрлө милли кейемдәрҙәге тәрбиәселәр, тәрбиәсе ярҙамсылары еребеҙҙә төрлө милләт кешеләре дуҫ һәм татыу йәшәүен дә күрһәтеп тора.

“Әкиәт” үҙенән әллә нисә быуын ҡошсоҡтарын осорған, райондағы олпатлана барған балалар баҡсаһы. Уның тәүге тәрбиәләнеүселәре лә хәҙер аҡһаҡал йәшенә етеп киләләр. Бында башҡорт балаларының күп йөрөүе лә маҡтауға лайыҡ. Әлеге көндә 4 башҡорт төркөмө эшләп килә. Был байрамға ла мәктәп йәшендәге әҙерлек төркөмө балалары тәрбиәселәре Луиза Мөхәмәҙей ҡыҙы Мәүлетҡолова, Регина Рөфҡәт ҡыҙы Анисимова, өлкәндәр төркөмө тәрбиәселәре Рәмзиә Миңлебай ҡыҙы Ильясова, Луиза Фәнил ҡыҙы Хөсәйенова, беренсе кескәйҙәр төркөмө тәрбиәселәре Хәлисә Фәнис ҡыҙы Әминова, Физалия Дәүләтбай ҡыҙы Сафина, икенсе кескәйҙәр төркөмө тәрбиәселәре Лилиә Әсҡәт ҡыҙы Килмөхәмәтова, Алһыу Ғәзимйән ҡыҙы Латипова, музыкаль етәкселәре Венира Әмир ҡыҙы Хөсәйенова менән күңел биреп, ныҡлы әҙерләнгәндәр. Сара маҡсатлы, тәрбиәүи йәһәттән урынлы булһын өсөн балалар баҡсаһы мөдире Татьяна Михайловна Ефремова, өлкән тәрбиәсе Гөлнара Рамаҙан ҡыҙы Вәлиева ла үҙ тырышлыҡтарын һалған. Бында татыу, берҙәм коллектив тупланғаны ла күренеп тора, ниндәй эштә эшләүенә ҡарамаҫтан, республикабыҙ байрамы “Әкиәт”тә ҙурланһын өсөн һәр береһе үҙ көсөн, ярҙамын күрһәткән.

Кисәләрҙе балалар аңларлыҡ итеп алып барыусы тәрбиәсе Лилиә Килмөхәмәтова был сараны ла йәнле итеп алып барҙы. Ватаныбыҙҙың бөтә күркәмлеген үҙ эсенә алған был байрам “Башҡортостан тыуған ерем” күмәк йыр менән башланып, өлкән төркөм балаларының “Беҙҙең ил” йыры менән да-уам итте. Луиза Мәүлетҡолова балаларға рухлы итеп еребеҙҙең тәүге барлыҡҡа килеү тарихын һөйләп, сәхнәләштерҙе. Тәрбиәләнеүсе Заһиҙа Ҡотдосова башҡарыуындағы “Ҡорама”, ҡыҙҙар – Лиана менән Диананың “Әсәйемдең яулығы”, өлкән төркөм ҡыҙҙарының “Ҡурай”, тәрбиәселәрҙең “Бишбармаҡ” башҡорт, татар, сыуаш, рус бейеүҙәренә балалар ихлас ҡул сапты. Кескәйҙәрҙең “Тирмә” бейеү-уйыны ла бик ҡыҙыҡлы булды. “Косилка-молотилка” йыр-бейеүе һәр береһен йәнләндереп ебәрҙе. Ә инде һабантуй һөбә йыуыу менән башланып, балалар атта ла сабышты, ҡалаҡҡа йомортҡа һалып та йүгерҙе, һәр кем төрлө уйындарҙа ҡатнашты. Бында балаларҙың бер ҡатлылығынан, ихласлыҡтарынан, көлөү-алҡышлауҙар аша байрам күңелле төҫ алып, йыр-бейеү менән үрелеп барҙы. Республикабыҙҙың тыуған көнөн кескәйҙәр ҙурлап байрам итте, йолаларыбыҙҙы, ғөрөф-ғәҙәттәребеҙҙе аңдарына һеңдереп ултырҙы.

Милли ризыҡтарҙан, ошо ерҙә үҫкән емеш-еләк ҡайнатмаларынан, башҡорт балынан әҙерләнгән сәй табыны ла халҡыбыҙҙың аш-һыуға оҫталығын, егәрлелеген күрһәтеп тора ине бында.

Йәнлелек, йәмлелек бөркөлөп торған ерҙән аяҡтар теләр-теләмәҫ кенә ҡайтыу яғына ыңғайлаһа ла, күңел әсәһенән айырылырға теләмәгән илаҡ балалай уларҙан айырыла алмай тартҡылашты. Ҡараштар уларҙың нурлы йөҙөнән алыҫлашһа ла, ҡолаҡта балаларҙың шат та-уыштары әле лә яңғырап тора кеүек. Күңел дә шат, сөнки республикабыҙҙың киләсәге лә күңелдәренә бар матурлыҡты һыйҙырып, халҡыбыҙҙың рухи ҡиммәттәрен күреп үҫкән ошо кескәйҙәр ҡулында бит.

Әлфиә РАМАЗАНОВА.