-5 °С
Ясна

Бөтә яңылыҡтар

Мәҙәниәт һәм әҙәбиәт

28 Сентябрь 2018, 13:44

Һүҙ - ветерандарға

Халыҡ-ара оло йәштәге кешеләр көнө уңайынан бер шәлкем шиғыр тәҡдим итәбеҙ.

Ҡартлыҡ

Ғүмеремдең һуңғы миҙгеле -

Килеп тә етте ҡартлыҡ.

Ҡарт тәнемдә йән бар әле,

Был да миңә ҙур шатлыҡ.

Ҡайҙа барырға ла белмәй

Ашыға ғына ҡартлыҡ.

Мәҡәлдәгесә: үлем сысҡанға,

Бесәйгә көлкө, шатлыҡ.

Йәшлегебеҙ үтте – китте,

Һис тә туҡтатып булмай.

Һиҙҙермәйсә ҡартлыҡ килде,

Ҡыуып ебәреп булмай.

Ҡартайҙым тип, көс бөттө тип,

Бер ҙә тик тороп булмай.

Үткәндәрҙе иҫкә төшөрөп,

Ятамын уйлай-уйлай.

Йәшлегебеҙҙе һағынып

Йәшәйбеҙ әле бөгөн.

Ҡартайҙыҡ, тип зарланһаҡ та,

Ҡартаймай икән күңел.

Һәр миҙгелдең – үҙ законы,

Һис үҙгәртерлек түгел.

Ҡартлыҡтың законы бик ҡаты,

Бирешеп ҡуйма, күңел.

Мираҫ

- Мираҫыңа ни ҡала? – тип,

Һораһалар бер заман.

- Нимә ҡалыр икән? – тим дә,

Уйланам да, уфтанам.

Ауылыбыҙҙа иң ҡарт кеше,

Иң “бай” кеше мин үҙем:

Ғаиләмдә утыҙлап йән –

Шуға шатлана күңел.

Мираҫҡа ана шул “байлыҡ” –

Балалар, ейәндәр ҡала.

Эшләнмәгән эштәр ҡала,

Уй-тойғоларым ҡала.

“Үткәндәрҙе онотмағыҙ!”

Тигән теләгем ҡала.

Күктә йондоҙҙар ҡала,

Ҡояш ҡала, Ай ҡала.

Иҙрис ВӘЛИШИН.

Яңғыҙҡайын ауылы.

Урам буйлап атлай уҙаман

Ауыл урамынан бер ҡарт килә,

Сәләм бирәм уға баш эйеп.

Ә был мәлдә һары япраҡтар

Төшә ине ергә өҙөлөп.

Япраҡтарға ҡарап торҙо бабай,

Ҡаш өҫтөнә ҡуйып ҡулдарын.

Шул япраҡтар, әйтерһең дә, уның

Үткән көндәр, уҙған йылдары.

Ул йылдар бит бушҡа уҙмағандыр,

Үкенес юҡ үткән көндәрҙә.

Ауыр мәлдәр онотолған инде,

Шатлыҡ ҡына ҡалған хәтерҙә.

Иртә яҙҙан тракторы менән

Ул баҫыуға сығып ер һөрҙө.

Туҡ башаҡтар елгә тирбәлгәндә

Уңыш йыйырға ла өлгөрҙө.

Тиҫтерҙәре – кемдер көтөү көттө,

Һыйыр һауҙы йәки фермала.

Иҫтәлектәр иҫ китмәле оҙон,

Ғүмер үҙе ҡыҫҡа булһа ла.

Тик берәү ҙә данға ҡыҙыҡманы,

Таҡманылар орден-миҙалды.

Тыуған ерҙең изге тупрағында

Намыҫ менән уҙған эҙ ҡалды.

Урам буйлап атлай уҙаман,

Көҙгө елдәр килеп ҡағыла.

Һары япраҡ уға үткәндәрен

Хәтерләтте бөгөн тағы ла.

Фәрғәт ҒӘЛИН.

Үзбәк ауылы.

Ҡарттар көнө менән ҡотлайым

Йыл артынан йылдар үтеп

Йәшем етте 83-кә.

Хоҙай насип итһен инде

Етергә туҡһан өскә.

Тыуған көнөм тура килгән

Самый көҙгө байлыҡта.

Ҡалған ғүмеребеҙ үтһә ине

Иҫәнлектә-һаулыҡта.

Рәзимә БӘШИРОВА.

Красноусол ауылы.

Читайте нас:

Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Республике Башкортостан. Свидетельство ПИ № ТУ 02-01436 от 1 сентября 2015 года. Главный редактор: Кинзябаева Гульдар Барыевна.

Телефон

8(34740)2-16-31

Электрон почта

[email protected]

Адресы

453050, Республика Башкортостан,Гафурийский район, улица Фрунзе,33

Реклама хеҙмәте

8(34740)2-15-25

Редакция

8(34740)2-16-31

Кадрҙар бүлеге

8(34740)2-21-59