+14 °С
Облачно
Мәҙәниәт һәм әҙәбиәт
13 Ноября 2018, 09:45
Бер юлы ике Гран-при!
Районыбыҙҙың мәҙәни тормошонда ике ҙур еңеү: республиканың ике осонда барған бәйгеләрҙән таланттарыбыҙ бер юлы ике Гран-при алып ҡайтты.
Ғафури халыҡ театры артистары фестивалде ойоштороусылар менән.
Туймазы ҡалаһында Башҡорт халыҡ йырҙарын башҡарыусыларҙың "Оҙон көй" төбәк-ара конкурсында билдәле ҡурайсыбыҙ һәм йырсыбыҙ Рәмил Ҡотдосов еңеүсе булды. Конкурста республика райондары һәм ҡалалары, шулай уҡ Силәбе, Татарстан һәм Ҡаҙағстандан 70-кә яҡын башҡарыусы сығыш яһаны.
Әбйәлил районында РСФСР-ҙың һәм Башҡортостандың халыҡ артисы, Салауат Юлаев исемендәге дәүләт премияһы лауреаты, Башҡортостан Театр эшмәкәрҙәре берлеге рәйесе Әхтәм Әбүшахманов призына Республика һәүәҫкәр театрҙар фестиваленән Ғафури халыҡ театры ла төп бүләк – Гран-при менән әйләнеп ҡайтты. Улар бәйгегә яҡташыбыҙ Салауат Әбүзәр пьесаһы буйынса ҡуйылған “Сәйнүк ҡайнап сыҡҡан арала” комедия-фарсын тәҡдим иткәйне.
Районыбыҙ данын лайыҡлы яҡлаған ижадсыларыбыҙҙы ҡотлайбыҙ, яңы табыштар, еңеүҙәр теләйбеҙ.
