+23 °С
Болотло
Антитеррор
Бөтә яңылыҡтар

Еҙем-Ҡаранда... ай тотолған

“Ҡараншишмә” халыҡ театры әүҙем эшмәкәрлеге менән тамашасыға күптән таныш. Быйыл коллектив айырыуса ҡатмарлы классик әҫәргә тотонған.

М.Кәримдең “Ай тотолған төндә”һе профессиональ театрҙар өсөн дә еңел тема түгел. Ролдәр бүлеп бирҙең дә, ятланылар ҙа эш бөттө тигән һүҙ түгел бит, образдарҙы асырлыҡ ғәмең, тормош тәжрибәң, фекер тәрәнлегең, уй киңлегең кәрәк. Айырыуса Тәңкәбикә кеүек ике ут араһында янған бейбисәне кәүҙәләндерергә! Был ролгә Рәүилә Килмөхәмәтова йылдар буйы килде тиһәм дә, яңылышмам. Буй-һыны ла, йәше-төҫө лә, килбәте лә килешле. Үҙ көсөнә нығыраҡ ышаныу ғына кәрәк. Ҡараншишмәләрҙең Риф Ихсановтары булыуына ихлас көнләшәм. Тамашасыны ауыҙына ҡаратып, иғтибарын биләп тота торған эске көсө бар уның. Ышанаһың, ышандыра. Риф ағайҙың Дәрүише ысынлап та юл йөрөүҙән талсыҡҡан, йәшәүенән арыған юлсы кеүек күҙ алдына баҫты һәм йәлләү уятты, аҡһаҡал төҫөнә ҡарап, интригалар ҡороусы ҡара эсле бәндә итеп ҡабул итке килмәне. Динира Биктимерованың Шәфәғе бик баҫылған, сабыр булһа ла, ҡәйнәгә ҡаршы тауыш күтәрергә баҙған килен булып күренде. Рита Шагиева кәүҙәләндергән Зөбәржәттең яңғырауыҡлы-сылтырауыҡлы тауышы ғашиҡ ҡыҙға килешеп тора. Бер кереп кенә сыҡҡан арала етеш йәшәгән бейҙән хәйерсе хәленә тиклем тиерлек ҡалған Ырыҫҡол бейҙең кисерештәрен Венер Ғәбдиев бирә алды. Аҡйегет ролендә Дамир Биктимеров уйнаны, был образдың шиғри һүҙҙәре күп, бәлки сәсәнлегенә баҫым яһарға кәрәк тә булғандыр. Илдар Әбделмәновтың Ялсығоло үҙ эшен, баһаһын яҡшы белгән һәлмәк холҡло тоғро ялсы. Бәләкәй Ишмырҙаны Илһам Ғиззәтуллин уйнап һөйөндөрҙө. Спектаклдең башынан-аҙағына тиклем тотоп торған образ Диуана булды. Уны кәүҙәләндереүсе Фәнзилә Йәнешеваға ҡат-ҡат афарин әйтке килә. Башҡа эпизодтарҙа Фатих Әбделмәнов, Гүзәл Шафиҡова, Илнур Мөрәсов, Рәзинә Исҡужина, Гөлшат Рахманғолова, Зәйтүнә Искәндәрова ҡатнаштылар. Шулар араһынан Рөстәм Шәйәхмәтовты айырып билдәләп китер инем, уны ҙурыраҡ образда ла һынағы килә.

Еҙемҡарандарҙың татыу коллектив, әйтергә яраһа, команда туплай алыуҙарына аҡ көнләшеү менән көнләштем, һоҡландым. Бер ҡуйған спектакль өсөн һәр образды асыуға ярҙам итерлек, эстәлегенә килешле кейемдәр тектергән башҡа халыҡ театрын белмәйем. Сәхнәне хөрмәт итеү, шөғөлөңә бирелгәнлектер был. Декорация ла, музыкаль биҙәлеш тә драманы асыуға бик булышты. Режиссер Д.Биктимероваға һәм был ҙур коллективҡа артабан да уңыштар юлдаш булһын.

Рәйлә Сабитова.
Читайте нас в