“Марат”та вакцина эшләтергә була

Бындағы эш барышы менән танышып, гәзит уҡыусыларға был уңайлылыҡ хаҡында аңлатып үтергә булдыҡ. “Марат” сауҙа үҙәгенә ингән ерҙә магазиндар яғына кереүселәрҙе температураһын үлсәп, вакцина эшләтеү сертификаттарының булыу-булмауын тикшереп үткәрәләр. Ә инде вакцинаның беренсе һәм икенсе компонентын эшләтергә килеүселәргә прививка эшләтеү бүлмәһен өйрәтеп ебәрәләр.
Вакцина эшләтеү бүлмәһенә бар кәрәк-яраҡ урынлаштырылған. Прививка яһатыусы иң тәүҙә анкета тултыра. Бында Үҙәк ра-
йон дауаханаһының шәфҡәт туташтары алмашлап эшләйҙәр. Беҙ барғанда фельдшер Алһыу Әсфәндийәрова һәр бер килгән кешенең хәл-торошон тикшергәндән һуң, шәфҡәт туташы Жәүфирә Ишмөхәмәтова кәрәкле компонентты эшләй ине. Шуны ла әйтергә кәрәк, тәжрибәле медицина хеҙмәткәрҙәре эштәрен оҫта, еңел башҡаралар. Алһыу Ғилметдин ҡыҙының медицина өлкәһендәге эш стажы 30 йылдан ашыу булһа, Жәүфирә Әхмәтдин ҡыҙының - 36 йыл. Вакцина эшләтеүсе һәр кемгә “Берҙәм Рәсәй”ҙең бүләктәре лә тапшырыла, һуңынан укол һалдырғас, ултырып торорға ла мөмкин. Был пунктта, шәмбе, йәкшәмбенән тыш, көн һайын сәғәт 11-ҙән 5-кә тиклем төшкө ялһыҙ эшләйҙәр.
Красноусолда йәшәүсе Илгиз Нафиҡов прививканың икенсеһен эшләтергә килгән ине. “Эшләтергә кәрәк тип уйлайым. Беренсеһен һәйбәт үткәрҙем. Һаулыҡты хәстәрләргә, коллектив иммунитет булдырырғы кәрәк бит инде”, - тине ул.
- Вакцина эшләтеүҙең төп маҡсаты – сирҙе йоҡтороу “сылбырын” өҙөү тора. Шуға ла һәр кем аңлап, тиҙерәк прививка эшләтеү сараһын күрһә ине, - тип беҙҙе оҙатып ҡалды бында эшләүсе медицина хеҙмәткәрҙәре.
Кемдәргә уңайлы, яҡын - оҙаҡҡа һуҙмай, вакцина эшләтергә “Марат”ҡа килегеҙ.