Ауыл сәскә атырға тейеш

Табын ауыл мәҙәниәт йортонда уҙған осрашыуға халыҡ бик күп йыйылды. Төп доклад - 2018 йылға отчет менән Табын ауыл биләмәһе башлығы Андрей Аверьянов сығыш яһаны.

Табын ауыл биләмәһенә 10 ауыл ҡарай. 1126 йорт-хужалыҡта 3597 кеше йәшәй.

А.В.Аверьяновтың сығышынан күренеүенсә, былтыр Табын ауылының Үҙәк урамы, Березовка ауылы автомобиль юлдарына, Архангелка ауылы клубы түбәһе һәм ҡыйығына ағымдағы ремонт уҙғарылған, көнкүреш ҡалдыҡтары түгеү урыны биләмәһе таҙартылған, Березовка һәм Архангелка ауылдарында юл билдәләре урынлаштырылған, Архангелка һәм Павловка ауылдарында ҡоҙоҡтарҙы ремонтлау өсөн тимер-бетон ҡулсалар һатып алынған, Родина ауылында урам яҡтыртыу системаһына ағымдағы ремонт уҙғарылып, 12 фонарь, ошо уҡ ауылда автобус туҡталышы урынлаштырылған, Табын ауылында урам яҡтыртҡыстар монтажлап ҡуйылған. “Аныҡ эштәр” проектына ярашлы, Архангелка ауылы мәктәбе ҡоймалары ремонтланған, Табын ауылындағы “Солнышко” балалар баҡсаһының тәҙрәләре пластикҡа алыштырылған, балаҫтар һатып алынған һәм баҡсаға Красноусолдағы 2-се мәктәптән алынған мебель комплекты тапшырылған. Ҡаты көнкүреш ҡалдыҡтарын ваҡытлыса йыйыу өсөн 18 контейнер әҙерләнеп, 13-ө урынлаштырылған, 8 кубометрлы 3 контейнер һатып алынып, берәүһе – Родина ауылында, икәүһе Табында ҡуйыласаҡ.

Табын, Родина, Березовка, Павловка, Әхмәт ауылдары халҡы газ яғыулығы менән файҙалана. Әммә был ауылдарҙа йорттарға газ үткәреү бик түбән, ни бары 54 процент тәшкил итә. Мәҫәлән, Березовкала 54 йорттоң 15-ендә генә (28%), Павловкала 35-тең 11-ендә (31%), Табында 640-тың 335-ендә (52%), Әхмәттә 27-нең 11-ендә (41%), Родинала 266-ның 179-ында (67%) газ үткән.

Биләмәлә ауыл хужалығы предприятиелары байтаҡ ҡына. “Урожай”, “Г.М.Тахтаров”, “Агролэнд”, “Агрохим”, “Солнышко”, “Восход-СТ” хужалыҡтары үҙ эшмәкәрлеген алып бара.

Ауыл биләмәһе буйынса һыйыр малдары һаны 790 баш, шуның 341-е – һауын һыйырҙары, 840 баш һарыҡ-кәзәләр, аттар - 127, сусҡалар - 695, ҡош-ҡорт – 4750, ҡуяндар – 87, 1370 баш умарта күсе аҫрала.

Биләмә башлығы шәхси хужалыҡтарҙа үҙҙәренән артҡан малсылыҡ продукцияһы, ит, бал менән район үҙәгендә, ҡалаларҙа уҙған йәрминкәләрҙә әүҙем ҡатнашып, халыҡты тәьмин итеүселәрҙе лә атап үтте. Улар: Павловка ауылынан Л.А.Краснова, Т.В.Ильясова, Яңы Бурлынан Мырҙағоловтар, Иманғоловтар, Табындан И.Ғ.Зәйнетдинов, З.Ш.Степаненко, Н.А.Мещерякова, И.С.Ишбулатов һәм башҡалар.

Демографик хәлгә килгәндә, уҙған йылда тыуым бынан алдағы йылдарға ҡарағанда күберәк булған, 37 сабый донъяға килгән, 35 кеше мәрхүм булған.

Быйылға ла күләмле генә эштәр планлаштырылған. 2018 йылда һатып алынып, Табын ауылында урынлаштырыу планлаштырылған балалар майҙансығын быйыл яҙ ҡуйыу күҙаллана. Ошо уҡ ауылдағы Беренсе Май урамы юлы, Родина ауылында юл ремонтлау, ауылдарҙың барыһында ла урам яҡтыртҡыстарын ҡуйыуҙы тамамлау, Архангелка һәм Табын ауыл-

дары мәҙәниәт йорттарының иҙәндәрен алыштырыу, Павловкала ҡоҙоҡто ремонтлау ҡаралған.

Биләмә башлығының сығышынан һуң 8-се округтан ауыл Советы депутаты Е.Н.Николаева үҙ эшмәкәрлеге менән таныштырҙы. Район вет-

станцияһы начальнигы Ф.Һ.Зәйнетдинов профилактика мәсьәләләренә туҡталды, район башҡорттары Ҡоролтайы башҡарма комитеты рәйесе булараҡ, эскелеккә ҡаршы көрәш башлаясаҡбыҙ, тип белдерҙе.

Ултырыш һуңында район хаки-

миәте башлығы Фәнзил Сыңғыҙов ҡыҫҡаса райондағы хәл-торош менән таныштырҙы. Халыҡты борсоған һорауҙарға яуап бирҙе. Һорауҙар араһында Табын ауылындағы күп фатирлы йорт подъездарын ремонтлау, ошо уҡ ауылдағы Усольская урамында һыу, берәҙәк эттәр, ауыл мәктәбенә төкәтмә төҙөү, Ағиҙел йылғаһы ярҙарын нығытыу, Красноусолға илткән юлға транспорт туҡталышы ҡуйыу, Родина ауылындағы Көньяҡ урамдың юлын ремонтлау мәсьәләһен күтәрҙеләр, был ауылға маршрут автобусының инмәүенә, Интернет булмауға ла зарланыусылар булды. Фәнзил Фәйез улы: “Табын ауылы сәскә атырға тейеш!”- тип урындағы халыҡты дәртләндереп ултырышты осланы. Йыйылыш һуңында ҡарар ҡабул ителде һәм ошоноң менән Табын ауыл биләмәһе Советы депутаттарының асыҡ ултырышы тамамланды. Йыйылыштан һуң район етәкселеге һәм белгестәре шәхси һорауҙар буйынса ҡабул итеү уҙғарҙы.