Ағас ултыртыу – интерактив картала

БР Урман хужалығы министрлығында республика райондарының административ үҙәктәре эргәһендә дөйөм майҙаны 400 гектарҙан ашыу 120 урман участкаһы һайлап алынған. Бер миллион 600 меңдән ашыу үҫенте ултыртыу күҙаллана. Быйыл бөтәһе 7 мең гектарҙан ашыу майҙанда йәш ағастар ултыртыла.

Айлыҡ барышында 27 апрелдә «Ағас ултырт - ғүмер бүләк ит!» девизы аҫтында «Йәшел Башҡортостан» берҙәм республика акцияһы үтте.

Ағас ултыртыу өсөн тағы бер дата билдәләнгән - 18 май. Урман хужалығы министрлығында ағас ултыртыуҙың интерактив картаһы эшләй башланы. Ирекмәндәргә айырым участкалар бүленгән. Картала һәр райондағы ойоштороусылар тураһында ентек-ле мәғлүмәт, уларҙың бәйләнеш телефоны баҫылған. Теләгән һәр кем акцияла ҡатнаша һәм ағас ултырта ала. Бының өсөн картала урын һайлап, шунда барырға кәрәк.