В. Путин «Торатау» геопаркы менән танышасаҡ

Башҡортостандың Туризмды үҫтереү үҙәге етәксеһе Артур Иҙелбаев әйтеүенсә, Өфөлә дәүләт башлығын «Торатау» геопаркы проектының концепцияһы менән таныштырыу ҙа ҡаралған. Геопарк уратып алған дүрт райондың 3,9 мең квадрат метр территорияһын биләргә, Ғафури районындағы Тоҙйылғаны («Красноусол» шифаханаһы биләмәһендә урынлашҡан халыҡ-ара әһәмиәттәге объект) һәм Стәрлетамаҡ районындағы Йөрәктау, Шахтау шихандарын да үҙ эсенә алырға тейеш. Парк инеү сикләнгән һәм инфраструктура, сервис урынлашҡан рекреацион зоналарға бүленә. Йәйәүлеләр, велосипед һәм автомобиль юлдары паркта төп файҙаланыу объекттары булырға тейеш. Туристарға махсус экскурсия маршруттары тәҡдим ителә.

Яҡынса мәғлүмәттәр буйынса, геопарк проекты 2020 йылдың көҙөнә әҙер була. Ул саҡта «Торатау»ҙы халыҡ-ара статусын алыу өсөн ЮНЕСКО эгидаһына индереүгә ғариза бирергә мөмкин.

Башҡортостан Башлығы вазифаһын ваҡытлыса башҡарыусы Радий Хәбиров 2018 йылдың 12 декабрендә «Торатау» геопаркын булдырыу тураһындағы указға ҡул ҡуйғайны.

#ВладимирПутин