Байрамдарын ярышып үткәрҙеләр

Еңел атлетика буйынса бәйгеләрҙә балаларҙан алып өлкәндәргә тиклем теләгән һәр кем ҡатнашып, үҙ дистанцияларында еңеүҙәр яуланы.

Футбол ярышында Красноусол студенттары командаһы еңеүҙе ҡулдарынан ысҡындырманы, Табын ауылы футболсылары – 2-се, район үҙәгенең Һамар биҫтәһе командаһы 3-сө урын яуланы.

Волейбол ярышы ла бик сәмле барҙы. Балалар-үҫмерҙәр спорт мәктәбендә уҙған бәйгелә ир-егеттәр араһында Красноусол ауылы командаһына – 1-се, юлыҡтарға – 2-се, Красноусолдағы 3-сө мәктәп командаһына 3-сө урын бирелде. Ә ҡыҙҙар парлашып уйнаны. Турнирҙа Рушана Насирова (КБГИ) менән Рәйлә Ғүмәрованың (2-се мәктәп) дуэты еңеүгә иреште. Вероника Сибәғәтуллина менән Розалия Хәкимова (3-сө мәктәп уҡыусылары) көмөш миҙалға лайыҡ булһа, район үҙәге мәктәптәрен тамамлаған Айгүзәл Иждиһатова менән Виктория Батыршинаға 3-сө урын бирелде.

Урам баскетболында Красноусолдағы 2-се мәктәп спортсыларына етеүсе булманы, тәүге ике урынды тап был мәктәп баскетболсылары яуланы, Красноусол башҡорт гимназия-интернаты командаһы – 3-сө урында. Ә ҡыҙҙар араһындағы бәйге 1-се мәктәп командаһы еңеүе менән тамамланды.

Спорт байрамында ҡатнашып, призлы урын яулаусыларҙың барыһы ла район хакимиәте спорт комитетының миҙалдары һәм Маҡтау грамоталары менән бүләкләнде.

Әлбиттә, байрам көнөндә районыбыҙ спортсылары ғына түгел, ә уларҙың тренерҙары, етәкселәре лә юғары кимәлдә бүләкләүгә лайыҡ булды. Өфөлә Физкультурниктар көнөнә арналған байрам сараһына саҡырылып, районыбыҙҙа спортты үҫтереүгә тос өлөштәрен индергән ра-йон хакимиәтенең социаль һәм йәштәр сәйәсәте, физкультура һәм спорт бүлеге етәксеһе Шамил Хәкимов маҡтаулы билдә, Балалар-үҫмерҙәр спорт мәктәбе тренер-уҡытыусылары Вадим Килмөхәмәтов (футбол буйынса тренер) һәм Вил Үтәғолов (волейбол тренеры) БР Йәштәр сәйәсәте һәм спорт министрлығының Маҡтау грамоталары менән бүләкләнде. Ҡотлайбыҙ!