Яңырыуға грант алды

Быйыл тап ошо проектта Сәйетбаба ауыл мәҙәниәт йорто ҡатнашты. Проект халыҡты мәҙәни тормошҡа йәлеп итеү, уларҙың мәҙәни ялын төрлөләндереү, йәш таланттарҙы асыу һәм уларҙы артабан үҫтереүгә йүнәлтелгән. Уның сиктәрендә мәҙәниәт йорто 4 миллион һумлыҡ федераль грантҡа эйә булып, заманса яҡтыртыу ҡорамалдары, тауыш көсәйтеү аппаратураһы, “Асанай” халыҡ фольклор ансамбленә этник сәхнә кейемдәре, ҡыҙҙарҙың “Ынйылар” бейеү ансамбленә костюмдар (күлдәк, камзул, таҡыя, туфлиҙар), ирҙәр һәм ҡатын-ҡыҙҙар йыр ансамблдәренә сәхнә кейемдәре, мультимедиялы экран, профессиональ фото һәм видеоаппараттар, компьютерҙар, принтерҙар, ноутбуктар һатып алынған. Тиҙҙән милли биҙәүестәр әҙерләү өсөн биҙәкләү станогы һәм бильярд өҫтәле ҡайтырға тейеш. Киләһе йылға иһә мәҙәниәт йортон Мәҙәни үҙәк итеп үҙгәртеп ҡороу күҙаллана.

4 сентябрҙә “Кесе Ватан мәҙәниәте” федераль партия проекты буйынса тулыландырылған Сәйетбаба ауыл мәҙәниәт йортоноң презентацияһы үтте. Сәйетбабаларҙың шатлығын уртаҡлашырға килгән “Берҙәм Рәсәй” партияһының “Кесе Ватан мәҙәниәте” проектын тормошҡа ашырыу буйынса йәмәғәт советы ағзаһы, Дәүләт Думаһы депутаты ярҙамсыһы Юрий Георгиевич Стульников, “Берҙәм Рәсәй” сәйәси партияһының Ғафури районы бүлексәһе етәксеһе Салауат Мөхәмәт улы Йосопов, район хакимиәте башлығының социаль мәсьәләләр буйынса урынбаҫары Гүзәл Зөфәр ҡыҙы Байдәүләтова һәм башҡа ҡунаҡтарҙы мәҙәниәт йорто алдында хөрмәтләп ҡаршы алдылар. Фойела Сәйетбаба, Имәндәш ауылы оҫталарының, ағинәйҙәренең һәр төрлө ҡул эштәренән күргәҙмә ойошторолған. Ҡунаҡтар оҫталыҡ күргәҙмәлеге, мәҙәни усаҡ менән танышып сыҡҡандан һуң, Сәйетбаба һәләттәренең бай йөкмәткеле концертын ҡараны. Ул ҡунаҡтарҙың сығыштары менән үрелеп барҙы. Ауыл оҫтаһы Рабиға Йәрмиеваға БР Мәҙәниәт министрлығының “Халыҡ оҫтаһы” Дипломы тапшырылды. Шулай уҡ район мәҙәниәт һарайы артистарының, Имәндәш мәҙәниәт йорто фольклор төркөмөнөң йыр-моңдары, Бурлы мәҙәниәт йортонан Инсаф Ғәзизов башҡарған татар халыҡ бейеүе сараға биҙәк өҫтәне.

Сараны алып барған район мәҙәниәт һарайы артистары Рәзилә Хәбибуллина менән Фәнзил Ғәлин мәҙәниәт йорто аралашыу, төрлө мөһим мәсьәләләрҙе уртаға һалып һөйләшеү үҙәге булып тороуын билдәләп, киләсәктә лә яңыртылған мәҙәниәт усағында үткәрелгән һәр сарала ауылдаштар әүҙем ҡатнашыр, ишектәре һәр кемгә асыҡ булыр, тигән теләктә ҡалды.