Балаларға арналған ғүмер

Ауылдаштарын аң-белемгә әйҙәүсе Әбделғәзиздең ейәнсәре Рәмилә Әширәф ҡыҙы Сәйәхова ла (ҡыҙ фамилияһы) изге уҡытыусы һөнәрен һайлай. Үрге Таһир башланғыс мәктәбенән һуң, Башта Билал, һуңынан Темәс мәктәптәрендә уҡып, һигеҙ йыллыҡ белем ала һәм Сибай педагогия училищеһына уҡырға инә. 1979 йылда башланғыс кластар факультетын тамамлағас, йүнәлтмә буйынса районыбыҙҙың Ҡурғашлы урта мәктәбенә эшкә ебәрелә. Тәүге йылда уҡ уға беренсе класс уҡыусылары менән эшләргә тура килә. Училищела үҙләштерелгән төплө тео-ретик белем, практикала алынған күнекмәләр ярҙам итә. Тәжрибәле уҡытыусыларҙың да кәңәштәре ярап ҡуя. Үҙенең белемен камиллаштырыу өҫтөндә лә ныҡышмалы эшләй йәш уҡытыусы. Ситтән тороп Стәрлетамаҡ дәүләт педагогия институтының башланғыс кластар бүлегенә уҡырға инеп, уны 1985 йылда уңышлы тамамлай.

1992 йылда уҡытыусыларҙың район конкурсында ҡатнашып, "Йыл уҡытыусыһы” исеменә лайыҡ була. 1998 йылда республика бәйгеһендә көс һынаша һәм айырым номинацияла призер була. Байтаҡ тәжрибә туплаған Рәмилә Әширәф ҡыҙын башҡорт мәктәптәре буйынса башланғыс класс уҡытыусыларының методик берекмәһе етәксеһе итеп тәғәйенләйҙәр. Ете-һигеҙ йыл ошо йөктө тартып, райондың төрлө мәктәптәренә йөрөп асыҡ дәрестәр үткәрәләр, кластан тыш саралар уҙғаралар, эш тәжрибәләре менән уртаҡлашалар.

Уҡытыусы методик белемен камиллаштырыу өҫтөндә лә ныҡышмалы эшләй. 2009 йылда педагогия фәндәре кандидаты Ә.Т.Мәүлийәрова менән берлектә 4-се синыф өсөн “Туған тел” дәреслегенә методик ҡулланма баҫтырып сығаралар. Ошо уҡ йылда ул “Мәғариф” милли проекты сиктәрендә йөҙ мең һумлыҡ грантҡа лайыҡ була.

Йәмәғәт эштәренән дә ситтә ҡалмай Рәмилә Әширәф ҡыҙы. Күп йылдар мәктәптең проф-союз, ауылдың ҡатын-ҡыҙҙар ойошмаларына етәкселек итә. Мәктәп уҡытыусыларының художестволы үҙешмәкәр түңәрәгендә лә әүҙем ҡатнаша, үҙен бына тигән актер итеп таныта.

Эшендәге уңыштары өсөн “Башҡортостандың мәғариф алдынғыһы” исеменә лайыҡ була, шулай уҡ Рәсәй Мәғариф министрлығының Маҡтау грамотаһы менән бүләкләнә.

Рәмилә Әширәф ҡыҙы Ҡурғашлы ауылы егете Хәлим Ғизетдин улы Зәйниев менән матур тормош ҡороп, бер-бер артлы ул һәм ҡыҙ үҫтерәләр. Балалары икеһе лә Өфө дәүләт нефть университетын тамамлап, бөгөнгө көндә Айнур Өфө оргсинтез заводында смена начальнигы, Розалия Өфөлә проект институтында әйҙәүсе белгес булып эшләйҙәр. Матур, тәрбиәле балалар үҫтерәләр.

Зәйниевтар йәшәгән йорт, ихата ауылға ҡот биреп ултыра. Бөтә уңайлыҡтар, биҙәлеш йорт хужаһының оҫта ҡулдары тарафынан башҡарылған. Ә йорт тирәләй балҡып, көлөп ултырған сәскә түтәлдәре хужабикәнең уңғанлығын күрһәтә.

- Хәҙер икебеҙ ҙә ялдабыҙ. Ғүмерҙең ҡәҙерен белергә тырышабыҙ. Төрлө ҡалаларға сәйәхәт ҡылабыҙ. Буш ваҡытта китаптар уҡыйбыҙ. Ғаилә шәжәрәләрен төҙөү менән мәшғүлбеҙ. Һаулыҡ булһа, пландар ҙур, - ти Рәмилә Әширәф ҡыҙы.