Рухи ҡиммәттәр һағында

“Красноусол” шифаханаһының Ял үҙәге фойеһында “Сыуаш халыҡ сигеүҙәре, сыуаш ҡатын-ҡыҙҙарының традицион биҙәүестәре” исемле бай күргәҙмә
ойошторолдо. Тантаналы өлөштө асып, Рәсәй Ҡатын-ҡыҙҙар союзының төбәк бүлексәһе рәйесе урынбаҫары, Рәсәй юристары ассоциацияһының Башҡортостан бүлексәһе башҡарма комитеты ағзаһы Надежда Крылова, һәр ҡатын-ҡыҙ - ул үҙ ғаилә усағын һаҡлаусы ғына түгел - ул ғүмере буйы мәҙәниәтте, халыҡ йолаларын, ғөрөф-ғәҙәттәрен, туған телде һаҡлау өсөн янып-көйөп йәшәй, тип билдәләне.
- Минең һеҙгә, форумда ҡатнашыусылар, теләгем шул: үҙегеҙҙең туған телегеҙҙә бөгөнгө сара сиктәрендә генә түгел, ә һәр ваҡыт һөйләшегеҙ. Оло быуындан үҙ балаларығыҙға, ейән-ейәнсәрҙәрегеҙгә һәм бүлә-бүләсәләрегеҙгә күскән халҡыбыҙ байлығына һөйөү тәрбиәләгеҙ. Илебеҙ халыҡтарының көсө берҙәмлектә булыуын онотмағыҙ. Шул саҡта ғына тыуған илебеҙгә, бөйөк илебеҙгә көнбайыштан иҫкән елдәр ҡурҡыныс булмаясаҡ, - тип һыҙыҡ өҫтөнә алды Надежда Николаевна.
Ҡатнашыусылар алдында шулай уҡ БР Ҡатын-ҡыҙҙар союзы Президиумы ағзаһы, “Беҙ бергә” йәмәғәт ойошмаһы рәйесе, РФ мәғариф өлкәһенең почетлы хеҙмәткәре Гүзәл Шаһиева, БР “Сарпика” сыуаш ҡатын-ҡыҙҙары советы рәйесе, БР Ҡатын-ҡыҙҙары союзы идараһы ағзаһы, БР “Канаш” төбәк йәмәғәт ойошмаһы башҡарма комитеты ағзаһы, Башҡортостандың атҡаҙанған табибы Людмила Бәҙретдинова, “Красноусол” шифаханаһы директоры, БР атҡаҙанған һаулыҡ һаҡлау хеҙмәткәре Рәмил Бәҙретдинов, Ғафури районы хакимиәте башлығы урынбаҫары Гүзәл Байдәүләтова һәм башҡалар сығыш яһаны.
Пленар ултырыштан һуң форумдың эше “Тарихи мираҫты һаҡлау нигеҙендә үҫеп килеүсе быуынды рухи-әхлаҡи тәрбиәләүҙә төбәк-ара хеҙмәттәшлек” һәм “Тарихи-мәҙәни феномен булараҡ шәхси ҡатын-ҡыҙҙар милли кейеме” майҙансыҡтарында дауам итте. Сығыш яһаусылар ғаиләлә халыҡ йолалары рухында тәрбиәләүҙә сыуаш ҡатын-ҡыҙының роле, йәштәрҙе әүҙем мәҙәни эшмәкәрлеккә йәлеп итеү, үҙ мәҙәниәтен, телен һәм ғөрөф-ғәҙәттәрен өйрәнеүгә йәлеп итеү, ҡатын-ҡыҙ сәләмәтлеге, сыуаш ҡатын-ҡыҙҙары кейеме элементтары үҙенсәлектәре кеүек темаларға ҡағылды.
Сара сиктәрендә Рәсәй Ҡатын-ҡыҙҙар союзының, Башҡортостан Ҡатын-ҡыҙҙар союзының, “Сарпика” сыуаш ҡатын-ҡыҙҙары советының һәм Башҡортостанда Сыуаш милли конгресының Почет грамоталары тапшырылды. Форумда ҡатнашыусыларға “Красноусол” шифаханаһы менән танышыу экскурсияһы үтте. Сараны ойоштороусылар булып “Башҡортостан Республикаһында мәҙәниәтте һәм сәнғәтте үҫтереү” һәм “Башҡортостан Республикаһында Рәсәй милләтенең берҙәмлеген нығытыу һәм халыҡтарҙы этно-мәҙәни үҫтереү” дәүләт программалары сиктәрендә республиканың Мәҙәниәт министрлығы булышлығында БР Ҡатын-ҡыҙҙар союзы, БР “Сарпика” сыуаш ҡатын-ҡыҙҙары советы сығыш яһаны.

Рөстәм ХӘЛИМОВ.