29 октябрь – Комсомолдың тыуған көнө

Йәштәр үҙәгенең уңайлы залында был сара быуындар араһында ысын күпергә әйләнде - тәжрибә, ҡиммәттәр һәм хыялдар менән уртаҡлашыу өсөн комсомол дәүеренең йәштәр вәкилдәре һәм хәҙерге йәштәр саҡырылғайны. Залда фотоһүрәттәр, комсомол билеттары, ВЛКСМ дәүеренең Почет грамоталары һәм наградалары күргәҙмәһе урынлаштырылғайны, ә сәхнәлә бөтә тамашасыларҙы берләштергән музыка яңғырай. Комсомолдар менән осрашыуҙы “Форсат” йәштәр үҙәге хеҙмәткәрҙәре район ветерандар советы рәйесе Эльвира Әнүәр ҡыҙы Мөлөкова менән берлектә ойошторғайны.

Саҡырылған ҡунаҡтар - комсомол дәүере йәштәре: Нәсимә Әбделмәнова, Әнүәр Муллағолов, Рифҡәт Әхтәмов, Наил Латипов, Елена Жукова, Нәзирә Батыршина, Римма Зверева, Валерий Сергеев йыйылғайны сараға.

Сарала комсомол йырҙары ғына түгел, ә беҙҙе берләштергән заманса көйҙәр ҙә яңғыраны. Ҡатнашыусылар комсомолдарҙың башҡарған эше, уларҙың шәхесен һәм донъяны нисек ҡабул итеүе, был идеалдарҙың бөгөнгө көндә нисек актуаль булыуы тураһында һөйләне. Йәштәр фекер алышыуҙа әүҙем ҡатнашты, һорауҙар бирҙе һәм киләсәк тураһында фекерҙәрен белдерҙе.

Бындай саралар быуындар араһындағы бәйләнеште нығытыу, тарихи хәтерҙе тапшырыу һәм йәштәрҙе беҙҙең көндәрҙә әүҙем эшмәкәрлеккә илһамландырыу өсөн мөһим, тип ышанабыҙ. Байрам сәй эсеп, күңелле мөхиттә йылы хәтирәләр менән тамамланды.