Һеҙ - беҙҙең киләсәк!

Бөгөн районыбыҙҙың “Форсат” йәштәр үҙәгендә бик матур осрашыу үтте. “ГосСтарт.Диалог” проектына ярашлы район хакимиәте башлығы Венер Вахитов йәштәр менән осрашты. 

Проекттың маҡсаты йәштәрҙе дәүләт һәм муниципаль хеҙмәт үҙенсәлектәре менән яҡындан таныштырыу ине. Район үҙәге мәктәптәренең өлкән класс уҡыусылары, Ауырғазы күп профилле колледжы студенттары, йәштәр район етәксеһенә бик күп һорауҙар бирҙе. Венер Фәнир улы һәр һорауға ихласлап, нисек бар шулай яуап бирҙе. Үҙе лә уҡыусыларҙан ҡайҙа уҡыуҙары, кем булырға теләүҙәре тураһында ҡыҙыҡһынды. Иретеп йәбештереүсе-ташсы һөнәренә уҡып йөрөгән колледж студенты уҡып бөткәс Себергә эшкә барырмын ул тигәс, бөгөнгө көн менән генә йәшәмәҫкә, үҙ еребеҙҙә эшләргә, белем һәм тәжрибә тупларға, бер ҡасан да үҙ өҫтөңдә эшләүҙән туҡтамаҫҡа, аныҡ маҡсат-хыялдар ҡуйып, алға ынтылырға өндәне. Ә беҙ, тине Венер Фәнир улы, йәштәребеҙ районда ҡалһын өсөн лайыҡлы шарттар, эш урындары һ.б. булдырыуҙы үҙ өҫтөбөҙгә алабыҙ. Сөнки һеҙ беҙҙең киләсәк, һеҙ беҙҙән аҡыллыраҡ, етеҙерәк, замансараҡ. Артабан үҫешер өсөн һеҙҙең креатив ҡарашығыҙ, ҡыйыу пландарығыҙ беҙгә бик кәрәк!

Осрашыуҙың икенсе өлөшөндә Венер Вахитов уҡыусыларға паспорттар тапшырҙы. Сара күмәкләп фотоға төшөү менән тамамланды. 

Осрашыу тураһында тулыраҡ гәзитебеҙҙең алдағы һандарында уҡығыҙ.