Герой исеме мәңгеләштерелде

9 декабрь - Рәсәй Федерацияһы Президенты В.В.Путин Указына ярашлы, Ватан Ҡаһармандары көнө итеп иғлан ителде. Ошо иҫтәлекле көндә Красноусолда Геройҙар Аллеяһы янында тантаналы митинг үтте.

Кисә, 11 декабрҙә, йәнә ошо көн сиктәрендә тантаналы митингылар Нияз Мәжитов исемендәге Красноусол башҡорт гимназия-интернатында һәм Рәсәй Геройы Ф.А.Яҡупов исемендәге Бурлы урта мәктәбендә үтте.

Сараларҙың икеһендә лә Башҡортостан Республикаһы Хөкүмәте Премьер-министры урынбаҫары вазифаһын башҡарыусы Ирек Хәйривара улы Сәғитов, район хакимиәте башлығы Венер Фәнир улы Вахитов ҡатнашты һәм сығыш яһаны. Гимназияла мемориаль таҡтаташ асыу тантанаһында Юлыҡ ауылынан килгән махсус хәрби операцияла ике ейәнен (ҡыҙы һәм улының улдары) юғалтҡан 90 йәшлек Мәрзиә Шафиҡованың да ҡатнашыуы ҙур мәртәбә булды.

Красноусол башҡорт гимназия-интернатында уҙған митинг был белем биреү йортон тамамлаған Украинала махсус хәрби операция барышында хәрби бурысын үтәгәндә батырҙарса һәләк булған Илнур Фәрит улы Ғөбәйҙуллиндың яҡты иҫтәлеген мәңгеләштереү уңайынан гимназия фасадында мемориаль таҡтаташ асыуға арналды.