Районыбыҙҙа “Швейбат” тегеү цехы асылды

“Швейбат” тегеү цехын тантаналы шарттарҙа асыуҙа район хакимиәте башлығы Венер Вахитов, уның социаль мәсьәләләр буйынса урынбаҫары Гүзәл Байдәүләтова һәм ошо эшкә үҙ өлөшөн индергән ирекмәндәр, эшҡыуарҙар, әүҙемселәр ҡатнашты. Иң тәүҙә Венер Вахитов, Марина Виноградова ҡыҙыл таҫманы киҫкәс, барыһы ла был цехты күрергә эскә үтте.

• МХО-лағыларға кәрәкле әйберҙәр тегеү уйы 2024 йылдың октябрь айында тыуҙы. Рәсәйҙә шундай йөҙәрләгән цехтар асылып, әлеге көндә улар уңышлы эшләйҙәр һәм уларҙың теккән әйберҙәре һорау менән ҡулланыла. Һәм беҙҙең ирекмәндәр штабында ла ошондай цех асыу теләге менән йәшәй башланыҡ. Иң тәүҙә йылылыҡ тотоусы накидкалар - антидрон юрғандар тегергә планлаштырабыҙ, уны тегеү технологияһын өйрәнеп, беренсе эшебеҙ һеҙҙең алда ята. Команда дөйөм эшкә көсөн һалырға теләге булған һәр кемде үҙ сафына алырға шат. Әле лә бихисап кеше килеп ярҙам итергә әҙер, шундай кешеләр булыуы шатландыра, - тип һөйләп, үҙҙәренең башланғыстары менән таныштырҙы Светлана Таһирова менән Марина Виноградова.

Район хакимиәте башлығы Венер Фәнир улы ла был эште хуплап: “Был бәләкәй башланғыс ҙур эшкә юл алһын. Бик кәрәкле эш башлағанһығыҙ. Һеҙҙең барығыҙға ла һаулыҡ, уңыштар теләйем”, - тигән изге теләктәрен әйтте.

Ф.Яҡупов исемендәге һуғышсан хәрәкәттәр  ветерандары ойошмаһы рәйесе Илфат Закиров та үҙ теләктәрен еткереп: “Яугирҙәребеҙгә ярҙам булһын тигән маҡсат менән эшләйбеҙ. Ярты ғына көнгә килгәндә лә, байтаҡ ҡына эш башҡарырға мөмкин. Кемдер төшкә тиклем, ҡалғандар төштән һуң килеп эшләй ала. Ошо эшкә ярҙам итеүселәргә рәхмәт”, - тине.

Ысынлап та, был бик һәйбәт башланғыс. Бында йәштәр ҙә тәжрибәле апайҙарынан оҫталыҡ дәресе алып, теген эшенә өйрәнә аласаҡ. Ә әлегә улар һалдаттарға кәрәкле әйберҙәр тегәсәк.