Яҡташтарыбыҙ “Ҡалҡан һәм Роза” премияһы лауреаттары

Ошо көндәрҙә Санкт-Петербургта йыл һайын үткәрелеүсе “Ҡалҡан һәм Роза” премияһын тапшырыу тантанаһы үткән. Был ғәҙәти рәсми сара түгел, ә ысын матурлыҡ һәм ҡыҙ булмышы көсһөҙлөктә түгел, ә иҫ киткес сыҙамлыҡта, профессионализмда һәм кешеләрҙең яҙмышы өсөн яуаплылыҡты үҙ өҫтөнә алырға әҙерлектә булыуын көндәлек эш-ғәмәлдәре менән иҫбатлаған ҡатын-ҡыҙҙарға һоҡланыу һәм уларҙы данлау. Райондашыбыҙ, Ҡауарҙы ауылынан булған Лариса Рөфғәт ҡыҙы Өмөтбаева-Дәүләтбаева һәм яҡташыбыҙ, Күмертау районынан Любовь Егоровна Әхмәтова “Ижад энергияһы” номинацияһында Лауреат дипломы менән бүләкләнде. “Ижад энергияһы” - энергияһын мохтаждарға ярҙам итеүгә һәм социаль әһәмиәтле башланғыстарҙы тормошҡа ашырыуға йүнәлткән ирекмән ҡатын-ҡыҙҙар өсөн махсус номинация.
- Яҡташтарыбыҙҙы лайыҡлы награда менән ҡотлайбыҙ. Улар беҙҙең менән даими бәйләнештә булып, госпиталдәрҙәге яугирҙарыбыҙҙы эҙләп табып, улар хаҡында әсәйҙәрсә хәстәрлек күрә, яралы улдары, ирҙәре янына Санкт-Петербургҡа килгән әсәйҙәргә, ғаиләләргә лә ярҙам итә. Изгелектәрегеҙ, хәстәрлектәрегеҙ өсөн һеҙгә сикһеҙ рәхмәтлебеҙ һәм һеҙҙең менән ғорурланабыҙ, - тип ҡотлау сәләме ебәрә яҡташтарыбыҙға М.Шайморатов исемендәге ирекмәндәр штабы етәксеһе Рәмзиә Насирова. Ҡотлауҙарға беҙ ҙә ихлас ҡушылабыҙ.
Мәрхәбә СОБХАНҒОЛОВА.