“Башҡортостан пионеры” сафына баҫтылар

Тантаналы сарала район хакимиәтенең социаль эштәр һәм йәштәр сәйәсәте бүлеге мөдире Эльвира Сабирова, район хакимиәтенең социаль эштәр һәм йәштәр сәйәсәте бүлеге белгесе Олеся Мәжитова, район ветерандар советы рәйесе Эльвира Мөлөкова, Балалар ижады үҙәге директоры Рәмил Кинйәбаев, РФ-ның почетлы хеҙмәткәре, мәғариф алдынғыһы, хеҙмәт һәм пионерҙар хәрәкәте ветераны Ольга Григорьева, мәғариф бүлеге начальнигы урынбаҫары Юлия Судовикова һәм башҡалар ҡатнашты.

Майҙанда уҡыусылар тигеҙ сафтарға теҙелеп баҫҡас, отряд командирҙары “Алтын бал ҡорто” район балалар йәмәғәт ойошмаһы рәйесе Ольга Безовчукка рапорт биргәндән һуң, сара асыҡ тип иғлан ителеп,  “Башҡортостан пионерҙары” байрағы индерелде. Рәсәй Федерацияһы һәм Башҡортостан Республикаһы гимндары яңғыраны. Һәр ваҡыттағыса пионерҙар сафына кергән уҡыусылар изге эштәр йолаһын дауами итергә, пионерҙар ойошмаһы ҡағиҙәләрен үтәргә, кешеләргә шатлыҡ килтереп, файҙалы йәшәргә "Һәр ваҡыт әҙер!" тип ант бирҙеләр. Сараның хөрмәтле ҡунаҡтары сығыш яһап, уҡыусыларҙы пионер исеменә тап төшөрмәй, һәйбәт уҡырға, һәр эштә лә алдынғы булырға саҡырҙылар. Уҡыусылар пионерияға ҡағылышлы мауыҡтырғыс шиғырҙар һөйләне.

Йәш пионерҙарға галстукты ҡунаҡтар, ошо сарала ҡатнашыусылар бәйләне. Муйындарына галстук бәйләгән пионерҙар Геройҙар аллеяһындағы Билдәһеҙ һалдат, сик һаҡсылары стеллаһына, яугир-афғансылар, десантсылар һәйкәленә сәскәләр һалды һәм беҙҙең тыныслыҡ, бәхет өсөн көрәшкән батырҙарҙы бер минут тын ҡалып иҫкә алдылар. Байраҡты сығарғандан һуң, тантаналы сара тамамланып, галстук бәйләгән йәш пионерҙар үҙҙәрен ғорур тотоп, шат йылмайып таралышты. “Башҡортостан пионеры” сафына баҫҡан уҡыусыларҙы ҡотлайбыҙ.