Мөғәллимдәр кәңәш ҡорҙо

Пленар өлөш башланыр алдынан БР Дәүләт Йыйылышы - Ҡоролтай депутаты, БР Дәүләт Йыйылышы – Ҡоролтайҙың гражданлыҡ йәмғиәте институттарын үҫтереү, мәғлүмәт сәйәсәте һәм дин эштәре буйынса комитеты рәйесе Рөстәм Ишмөхәмәтов, БР Ветеринария идаралығы начальнигы Азат Йыһаншин, Өфө фән һәм технологиялар университетының Стәрлетамаҡ филиалы директорының фәнни эштәр буйынса урынбаҫары Павел Алёшин, район хакимиәте башлығы Фәнзил Сыңғыҙов, район Советы, ра-йон башҡорттары ҡоролтайы рәйесе Фаил Зәйнетдинов, мәғариф бүлеге етәксеһе вазифаһын башҡарыусы Алина Ҡунафина, мәғариф хеҙмәткәрҙәре һәм ветерандары, ауыл биләмәләре башлыҡтары фойела ра-йон мәктәптәре, балалар баҡсаларының грант һәм башҡа конкурстарҙа ҡатнашып, еңеү ҡаҙаныштары хаҡында һәм патриотик темаға арналған бай йөкмәткеле методик күргәҙмәләр менән танышты.
Ҡыҙыҡлы һәм мауыҡтырғыс күргәҙмәләрҙе ҡарап сыҡҡандан һуң, ҡунаҡтар сәхнә түренән урын алды. Рәсәй Федерацияһы һәм Башҡортостан Республикаһы флагтарын сығарыу хоҡуғы Красноусолдағы 1-се урта мәктәптең хәрби-патриотик клубы тәрбиәләнеүселәренә бирелде. Сәхнәгә ике яҡлап флагтар урынлаштырылғас, Рәсәй Федерацияһы һәм Башҡортостан Республикаһы Гимндары яңғыраны һәм мәғариф хеҙмәткәрҙәренең август конференцияһы асыҡ тип иғлан ителде.
Район хакимиәте башлығының социаль мәсьәләләр буйынса урынбаҫары, был сараның модераторы Зөһрә Әхтәмова “Белем биреүҙе трансформациялау: традицион белем биреүҙе үҫтереүҙең перспективалары һәм яңы мөмкинлектәре” темаһына уҙғарылған конференцияны асып, тантаналы сарала ҡатнашыусыларҙы сәләмләне һәм конференция эшендә ҡатнашыу өсөн белем биреү учреждениеларынан 400 педагог һәм етәксе хеҙмәткәр теркәлеүе хаҡында белдереп, барыһын да яңы уҡыу йылы уңайынан ҡотланы.
Экран аша РФ мәғариф министры Сергей Кравцовтың видеомөрәжәғәте-ҡотлауын тыңлағандан һуң һүҙ район хакимиәте башлығы Фәнзил Сыңғыҙовҡа бирелде. (Район хакимиәте башлығының сығышы киләһе һандарҙа айырым бирелә).
Кәңәшмәлә бар ғүмерен балаларға белем һәм тәрбиә биреүгә бағышлаған оло хөрмәткә лайыҡ педагогик хеҙмәт ветерандары сәхнә түренә саҡырылып, уларға Фәнзил Фәйез улы бүләктәр һәм сәскә гөлләмәләре тапшырып үтте.
Башҡортостан Республикаһы Ветеринария идаралығы начальнигы Азат Салауат улы сығыш яһап, барыһын да БР Башлығы Радий Хәбиров, шәхсән үҙе исеменән яңы уҡыу йылы уңайынан ихлас ҡотланы. Йыл һайын һәр районда ошондай саралар үтеүен билдәләп, бөгөн МХО-лағыларға ярҙам итеү беҙҙең төп тема булыуын әйтеп, мәғариф хеҙмәткәрҙәренә төрлө яҡлы ярҙам итеүҙә үҙ өлөштәрен индереүҙәре өсөн ҙур рәхмәтен еткерҙе. Сығышынан һуң бер төркөм алдынғыларға лайыҡлы наградаларын тапшырҙы. Н.А.Мәжитов исемендәге Красноусол башҡорт гимназия-интернатының технология уҡытыусыһы Рита Нәзированы, Балалар ижады үҙәгенең уҡыу-тәрбиә эштәре буйынса директор урынбаҫары Екатерина Гайдайҙы ”Башҡортостан Республикаһының мәғариф отличнигы” билдәһе, Красноусолдағы 2-се урта мәктәптең биология уҡытыусыһы Венер Басариевты, Үзбәк төп дөйөм белем биреү мәктәбе директоры Айгөл Ғәбдиеваны, Игенйылға төп дөйөм белем биреү мәктәбенең башҡорт теле уҡытыусыһы Мәүлиҙә Мозафарованы, Красноусолдағы 25-се “Әкиәт” балалар баҡсаһы тәрбиәсеһе Ирина Видинееваны БР Мәғариф һәм фән министрлығының Маҡтау грамоталары, имтихандарҙы ойоштороусылар Лилиә Хәсәнова, Аделя Морозованы БР Мәғариф һәм фән министрлығының Рәхмәт хаттары менән бүләкләп үтте.
БР Дәүләт Йыйылышы - Ҡоролтай депутаты Рөстәм Рифат улы Ишмөхәмәтов мәғариф конференцияһында ҡатнашыусыларҙы сәләмләне һәм бер төркөм хеҙмәт алдынғылары: Красноусолдағы 3-сө урта мәктәптең педагог-китапханасыһы Галина Калачиговаға, Табын урта мәктәбенең һынлы сәнғәт уҡытыусыһы Татьяна Суркинаға, КБГИ-ның социаль педагогы Илнара Хәбибуллинаға, район “Мәғариф бүлеге” ҡаҙна учреждениеһының үҙәкләштерелгән бухгалтерияһы бухгалтеры Әлфиә Кәримоваға, Балалар-үҫмерҙәр спорт мәктәбенең шахмат буйынса тренер-уҡытыусыһы Наталья Проценкоға, Красноусолдағы 1-се урта мәктәптең инглиз теле уҡытыусыһы Ольга Красноваға БР Дәүләт Йыйылышы – Ҡоролтайҙың Рәхмәт хаттарын тапшырҙы.
Район Советы рәйесе Фаил Һәҙиәт улы Зәйнетдинов район Советы һәм депутаттары, район башҡорттары ҡоролтайы исеменән август кәңәшмәһендә ҡатнашыусыларҙы етеп килгән яңы уҡыу йылы менән ҡотланы һәм эшендәге уңыштары өсөн: Красноусолдағы “Миләшкәй” балалар баҡсаһы тәрбиәсеһе Зөһрә Абдуллина, Красноусолдағы 3-сө урта мәктәптең физкультура уҡытыусыһы Виктория Батыршина, Ҡарағай урта дөйөм белем биреү мәктәбенең тәрбиәүи эштәр буйынса директор урынбаҫары Әлфиә Ғәлиәкбәрова, КБГИ тәрбиәсеһе Фәнилә Хисаметдинова, КБГИ-ның инглиз теле уҡытыусыһы Рәзинә Юнысова, Мораҡ төп белем биреү мәктәбенең география уҡытыусыһы Светлана Романова, Курорт мәктәбенең башланғыс кластар уҡытыусыһы Юлия Тихонова, Табын коррекция мәктәп-интернатының уҡытыусы-дефектологы Минәүзә Ишҡолованы ра-йон Советының Маҡтау грамотаһы менән бүләкләне.
Мәғариф бүлеге етәксеһе вазифаһын башҡарыусы Алина Фаил ҡыҙы Ҡунафина сығыш яһап, мәғариф системаһы эше, ирешелгән уңыштар тураһында бәйән итте (сығыш киләһе һандарҙа айырым бирелә) һәм мәғариф өлкәһендәге намыҫлы хеҙмәттәре, уңыштары өсөн Красноусолдағы 3-сө мәктәптең башланғыс кластар уҡытыусыһы Кристина Желтова, “Әкиәт” балалар баҡсаһының тәрбиәсе ярҙамсыһы Виктория Макарова, КБГИ-ның тәрбиә эштәре буйынса кәңәшсеһе Әлфиә Солтанғолова, Яңғыҙҡайын мәктәбенең мәктәпкәсә йәштәге төркөм тәрбиәсеһе Ләйсән Өмөтбаева, Красноусолдағы 1-се мәктәптең рус теле һәм әҙәбиәте уҡытыусыһы Индира Кандаловаға мәғариф бүлегенең Маҡтау грамоталарын тапшырҙы.
Өфө фән һәм технологиялар университетының Стәрлетамаҡ филиалы директорының фәнни эштәр буйынса урынбаҫары Павел Николаевич был юғары уҡыу йортонда беҙҙең райондан бик күп студенттар белем алыуын билдәләне, яҡшы белем һәм тәрбиә биргәндәре өсөн уҡытыусыларға рәхмәт һүҙҙәрен еткерҙе.
Кәңәшмә һуңында район хакимиәте башлығы Фәнзил Сыңғыҙов 11-се класс уҡыусыларын Берҙәм дәүләт имтихандарына әҙерләп, юғары һөҙөмтәләргә өлгәшкән Н.Мәжитов исемендәге Красноусол башҡорт гимназия-интернатының математика уҡытыусыһы Петр Михайловты, ошо уҡ белем усағының рус теле һәм әҙәбиәте уҡытыусыһы Альбина Ғәзизованы - 15 мең һум, Берҙәм дәүләт имтихандарында юғары күрһәткестәргә өлгәшкән КБГИ-ның сығарылыш 11-се класс уҡыусыһы Айназ Рафиҡовты 20 мең һум аҡсалата премия менән бүләкләне. “Рус мәктәбенең иң яҡшы башланғыс класс уҡытыусыһы” номинацияһында Красноусолдағы 1-се урта мәктәптең башланғыс кластар уҡытыусыһы Елена Берлина, “Милли мәктәптең иң яҡшы башланғыс класс уҡытыусыһы” номинацияһында Яңғыҙҡайын урта мәктәбенең башланғыс кластар уҡытыусыһы Рәйлә Ғәлиева, “Иң яҡшы мәктәпкәсә мәғариф учреждениеһының педагогик хеҙмәткәре” – “Әкиәт” балалар баҡсаһының өлкән тәрбиәсеһе Татьяна Вороширина, мәктәп уҡыусыларының Бөтә Рәсәй олимпиадаһының республика этабында юғары күрһәткестәре өсөн Елена Степанова (1-се мәктәп), Рәзинә Юнысова (КБГИ), Людмила Пухова (2-се мәктәп), Любовь Яковлева (2-се мәктәп), Татьяна Суркина (Табын мәктәбе), Марина Кочешкова (3-сө мәктәп) 10-ар мең һумлыҡ сертификатҡа эйә булдылар.
Намыҫлы, емешле хеҙмәте, өлгәшкән уңыштары, мәктәптә белем биреү сифатын күтәргәне өсөн “Мәғариф учреждениеһының иң яҡшы етәксеһе” номинацияһында 10 мең һумлыҡ аҡсалата бүләккә Красноусолдағы 2-се мәктәп директоры Марат Раил улы Басиров лайыҡ булды.
Аҡкүл урта мәктәбе “Йылдың иң яҡшы мәктәбе – 2023” номинацияһында еңеп - 100 мең һумлыҡ, Йөҙимән төп дөйөм белем биреү мәктәбе “Йылдың иң яҡшы төп белем биреү мәктәбе – 2023” номинацияһында 50 мең һумлыҡ аҡсалата сертификат менән бүләкләнде.
“Иң яҡшы методик күргәҙмәләр” өсөн мәктәпкәсә белем биреү учреждениелары араһында Красноусолдағы “Әкиәт” балалар баҡсаһы - 1-се, Аҡкүл – 2-се, Табын – 3-сө, яңғыҙҡайындар дәртләндереү призы, белем биреү мәктәптәре араһында Красноусолдағы 1-се мәктәп 1-се урын, 2-се мәктәп - 2-се, Мораҡ 3-сө урын, Яңғыҙҡайын, Үзбәк, Аҡкүл, Имәндәш мәктәптәре дәртләндереү призы алды.
Мәктәп яны уҡытыу-тәжрибә участкаларын махсус комиссия тикшереп, еңеүселәрҙе билдәләне: төп дөйөм белем биреү мәктәптәре араһында 1-се урын - Мораҡ мәктәбе, 2-се – Йөҙимән, 3-сө урын Үзбәк; урта белем биреү мәктәптәре араһында 1-се урын - Яңғыҙҡайын, 2-се урын - Красноусолдағы 2-се мәктәп һәм 3-сө урынға 3-сө мәктәп лайыҡ булды. Мәктәпкәсә белем биреү учреждениелары араһында Красноусолдағы “Әкиәт” балалар баҡсаһының “Буратино” урта төркөмө дәртләндереү призы менән, Ҡауарҙы ауылының “Йәншишмә” балалар баҡсаһы - 1-се, Красноусолдағы “Тирәккәй” балалар баҡсаһының “Гномики” кескәйҙәр төркөмө - 2-се, Красноусолдағы “Миләшкәй” балалар баҡсаһының “Тамсыҡай” кескәйҙәр төркөмө 3-сө урын алып ҡыуанды. Еңеүселәргә сертификаттар тапшырылды.
РФ һәм БР Гимндарын тыңлағас, флагтар алып сығылды, мәғариф хеҙмәткәрҙәренең август кәңәшмәһе ошоноң менән үҙ эшен тамамланы. Иртәгәһенә мәктәптәрҙә уҡытыусылар өсөн төрлө фәндәр буйынса, балалар баҡсалары мөдирҙәре һәм тәрбиәселәргә балалар баҡсаларында дискуссия майҙансыҡтары ойошторолдо.

Хеҙмәтенә күрә - хөрмәте

Райондың мәғариф системаһында намыҫлы хеҙмәттәре, юғары һөнәри оҫталыҡтары һәм үҫеп килгән йәш быуынға белем һәм тәрбиә биреүҙәге уңыштары өсөн Муниципаль район хакимиәтенең Маҡтау грамотаһы менән бүләкләнделәр:
Нәүфилә Фаяз ҡыҙы Аҡкөбәкова - Н.Х.Ғарипова исемендәге Ҡауарҙы дөйөм белем биреү мәктәбенең башланғыс кластар уҡытыусыһы;
Мәндүзә Рәйес ҡыҙы Батыршина – Н.А.Мәжитов исемендәге Красноусол башҡорт гимназия-интернатының башланғыс кластар уҡытыусыһы;
Ольга Николаевна Ғүмәрова – район “Мәғариф бүлеге” ҡаҙна учреждениеһының методик кабинет мөдире;
Елена Владимировна Зиновьева - Аҡкүл урта дөйөм белем биреү мәктәбе тәрбиәсеһе;
Айгөл Ғәйнулла ҡыҙы Латипова – Яңғыҙҡайын урта мәктәбе филиалы – Буруновка төп дөйөм белем биреү мәктәбенең рус теле һәм әҙәбиәте уҡытыусыһы;
Розалиә Рәйес ҡыҙы Собханғолова – Красноусолдағы 25-се “Әкиәт” балалар баҡсаһы тәрбиәсеһе;
Регина Владимировна Развеева – Табын коррекция мәктәп-интернатының башланғыс кластар уҡытыусыһы;
Светлана Ивановна Фомина – “Сифат тирмәне” ЯСЙ-е директоры.
Актив гражданлыҡ позицияһы, Юлыҡ ауылы мәктәбендә сыҡҡан янғынды ваҡытында һүндереү буйынса күрелгән саралар һәм күрһәткән тәүәккәллектәре өсөн Муниципаль район хакимиәтенең Рәхмәт хаттары менән бүләкләнделәр:
Фәнзил Сабирйән улы Сәфәрғолов - хеҙмәтте һаҡлау буйынса инженер;
Рәхимйән Шакирйән улы Юлыҡов - информатика уҡытыусыһы;
Юлай Салауат улы Яҡупов - Юлыҡ төп дөйөм белем биреү мәктәбе ҡарауылсыһы.

Башҡортостан Республикаһы Башлығы Радий Хәбиров:
- "Мәғариф беҙҙең өсөн махсус хәстәрлек өлкәһен тәшкил итә. Һәр мәктәптә – төпкөл ауылдарҙа ла, ҡалаларҙағы яңы биҫтәләрҙә лә – балаларыбыҙға сифатлы белем һәм тәрбиә алыу өсөн бөтә шарттар булдырылыуы мөһим". 2019 йылдан 2023 йылға тиклем Башҡортостан Республикаһында 650 белем биреү ойошмаһы һанлы йыһазлау комплекттары менән тәьмин ителде: 665 “Үҫеш нөктәһе”, туғыҙ “IT-куб” балалар һанлы мәғариф үҙәктәре, өс “Кванториум” балалар технопаркы төҙөлдө; ике мобиль технопарк һатып алынды”.

Таңсулпан Фәрит ҡыҙы РӘХМӘТУЛЛИНА, Йөҙимән мәктәбе директоры:
Республикабыҙҙа төрлө программалар эшләп килеүе мәктәптәр өсөн бик файҙалы. “Атайсал” проекты буйынса депутат Рөстәм Рифат улы Ишмөхәмәтов туған мәктәбенә ярҙам итеп, балалар баҡсаһындағы уйын майҙансығына кәрәкле әйберҙәр, спорт инвентарҙары алынды. 2024 йылда спорт залына ремонт үткәрелде. “Аныҡ эштәр” проекты буйынса мәктәп кәртәләнә башланы. Һуңғы йылдарҙа “Үҫеш нөктәһе” кабинеты йыһазландырылыуы ла мәктәп уҡыусылары өсөн ҙур ҡыуаныс булды. Президент фонды гранты конкурсына йомғаҡ яһалып, “Киләсәк уҡыусылары” мәғарифҡа ярҙам итеү фондының мәктәбебеҙҙең коммерцияға ҡарамаған ойошмаһы (етәксеһе Роза Искәндәрова) “Саңғы – сәләмәтлеккә һәм оҙон ғүмерлелеккә юл” проекты менән еңеп сыҡтыҡ. Былар барыһы ла төбәк, урындағы етәкселектең ярҙамы менән эшләнгән эштәр. Киләсәктә лә төрлө программаларҙа ҡатнашып, уңышлы эшләргә яҙһын.