Телгә һөйөү ғаиләнән килә

Рәзинә Юнысова Белорет районының Баҡый ауылында донъяға килә, 6 айлыҡ сағында ата-әсәһе Шәриповтар ғаиләһе Красноусолға күсә. Красноусолдағы 1-се урта мәктәпкә уҡырға төшөп, 1996 йылда 9-сы класты тамамлағас, Салауат педагогия училищеһының сит телдәр факультетының башҡорт бүлегенә уҡырға инеп, инглиз һәм немец теле уҡытыусыһы һөнәрен үҙләштерә. Уҡытыусы дипломына эйә булған йәш белгес районға әйләнеп ҡайтып, хеҙмәт юлын Ҡотлоғужа мәктәбендә инглиз теле уҡытыусыһы булып башлай. Бында бер аҙ хеҙмәт сынығыуы алғас, Красноусол башҡорт гимназия-интернатында - тәрбиәсе, Курорт мәктәбендә уҡытыусы булып эшләй. Башҡорт дәүләт педагогия университетын ситтән тороп тамамлап, юғары белемгә эйә була. 2009 йылда Красноусол башҡорт гимназия-интернатына күсеп, яратып һайлаған һөнәре буйынса балаларға инглиз теле серҙәрен аса.
Уҡытыусы – күп яҡлы, ҡатмарлы һөнәрҙәрҙең береһе. Заман менән бер рәттән атлағанда ғына эшеңдең уңыштарын күреп һөйөнөргә мөмкин булыуын мәғариф өлкәһендә эшләгән һәр кем яҡшы аңлай. 23 йыл дөйөм хеҙмәт стажы булған тәжрибәле уҡытыусы һәр дәресен балаларҙы ҡыҙыҡһындырырлыҡ итеп үткәрә. Бар булмышын уҡыусыларға белем биреүгә арнаған уҡытыусы яңынан-яңы методик алымдар ҡуллана, заманса технологияларҙы үҙләштерә. Талапсан, үҙ эшен яратып башҡарған уҡытыусыны балалар үҙ итә, дәрестәрен түҙемһеҙлек менән көтөп ала. Тырышлыҡ та бушҡа китмәй: уҡыусылары төрлө конкурстарҙа, олимпиадаларҙа, фәнни-ғәмәли конференцияларҙа район һәм республика кимәлендә призлы урындар яулайҙар. Улар араһында Юлиә Сәғәҙиева ОГЭ-ла инглиз телен районда иң юғары балға тапшыра, "Мәжитов уҡыуҙары", "Өмөтбаев уҡыуҙары" республика фәнни-ғәмәли конференцияларында II дәрәжә Дипломға лайыҡ булған. 10-сы класс уҡыусыһы Нургизә Исҡужина итальян теле буйынса Бөтә Рәсәй олимпиадаһының республика этабында призёр булған. Инглизсә йыр башҡарыусылар конкурсында Диана Рәхимова менән Эльнара Шәрипова 1-се урын яулайҙар. Йәш быуынға үҙ фәненән төплө белем биреү өсөн Рәзинә Дауыт ҡыҙы көсөн дә, ваҡытын да йәлләмәй. 2016 йылда “Йыл уҡытыусыһы” район конкурсында ҡатнашып, лауреат була. Күп йыллыҡ хеҙмәте төрлө кимәлдәге Рәхмәт хаттары, Маҡтау грамоталары менән баһаланған. Быйыл Бөтә Рәсәй олимпиадаһының республика этабында призёр әҙерләгән уҡытыусы сертификат менән бүләкләнә. 8 “Б” класының класс етәксеһе лә ул, гимназияла эшләү дәүерендә бер класты оло тормош юлына оҙатҡан да инде, уҡыусылары йөҙөнә ҡыҙыллыҡ килтермәйҙәр.
Уҡыусылары араһында яратҡан уҡытыусыларының юлынан китеп, инглиз теле уҡытыусыһы булып эшләүселәрҙән Ҡотлоғужанан Лилиә Сәғитова, КБГИ-ны тамамлаған Юлиә Фәйзуллина Өфө Фән һәм технологиялар университетының Стәрлетамаҡ филиалында башҡорт-инглиз бүлегендә уҡый.
Рәзинә Дауыт ҡыҙы уҡытыусылар династияһын дауам итеүсе лә. Атаһы Дауыт Әбдрәхим улы Шәрипов Белорет педучилищеһын тамамлаған, туғыҙ балалы ғаиләлә үҫкән, уларҙың алтауһы уҡытыусы һөнәрен һайлаған, барыһы ла тел белгестәре. Уларҙың дөйөм педагогик стажы 135-140 йыл самаһы тәшкил итә.
Рәзинә Дауыт ҡыҙы Красноусол егете Марат Юнысов менән тормош ҡороп, ике тиҫтә йыл матур уҡытыусы ғаиләһе булып йәшәйҙәр, ике ҡыҙ һәм бер ул тәрбиәләп үҫтерәләр. Ҡыҙҙары Алина КБГИ-ны тамамлаған, Өфө финанс университеты студенты. Динара гимназияла 7-се класта “5”-кә генә уҡый, икеһе лә оҫта бейей һәм йырлайҙар, иң кесеһе - улдары Асҡарға – 6 йәш. Ғаилә башлығы - Марат Рәмзил улы ла уҡытыусы, гимназия уҡыусыларына физкультуранан белем бирә. 3-сө мәктәпте тамамлағас, Стәрлетамаҡ физкультура техникумының көндөҙгө бүлеген, һуңынан Урал дәүләт физик культура академияһының Стәрлетамаҡ филиалын ситтән тороп ҡыҙыл дипломдарға эйә булып тамамлай. Хеҙмәт юлын туған мәктәбендә башлап, 2011 йылдан КБГИ-ла дауам итә. М.Юнысов күптәргә спортсы булараҡ билдәле. Буш ваҡыттарында спорт залына, волейбол секцияһына йөрөй, райондың ветерандар йыйылма командаһы ағзаһы ла. 3-сө мәктәптә эшләгәндә был спорт төрөнә уҡыусыларын да ылыҡтырып, волейбол буйынса тренер булған. Төп эшенән тыш, эшҡыуарлыҡ менән дә шөғөлләнә, төрлө сараларҙа, спорт бәйгеләрендә бағыусылыҡ ярҙамы күрһәтә. Әйткәндәй, Марат Рәмзил улының апаһы, йәғни атаһының һеңлеһе, Рәмзилә Исмәғил ҡыҙы ла 3-сө мәктәптә инглиз теле уҡытыусыһы булып эшләп, хаҡлы ялға сыҡҡан.
Н.Мәжитов исемендәге Красноусол башҡорт гимназия-интернатының коллегалары араһында ихтирамға лайыҡ булған, уҡыусыларының хөрмәтен ҡаҙанған ирле-ҡатынлы уҡытыусылары Рәзинә менән Марат Юнысовтарҙы Уҡытыусылар көнө менән ҡотлап, яуаплы эштәренең һөҙөмтәһен күреп, тағы ла юғарыраҡ уңыштарға өлгәшеүҙәрен теләйбеҙ.