“Йәш шайморатовсылар балы”нда булдыҡ

Шайморатов балы - күңелдә мәңгегә уйылып ҡалған көн булып ҡаласаҡ. Сөнки, был ябай бер сара ла, бал да түгел икәнлеген үҙ күҙҙәребеҙ менән күрҙек. Бында ҡатнашыу легендар Миңлеғәле Шайморатов исемен йөрөткән класта уҡыу абруйын, беҙ йөрөткән хөрмәтте сағылдырған ваҡиға булды.

Эйе, был исемде йөрөтөү - оло яуаплылыҡ. Беҙ тарихты ғына өйрәнмәйбеҙ, ә генерал сағылдырған ҡағиҙәләр буйынса йәшәргә тырышабыҙ: маҡсатҡа тоғролоҡ, ҡаһарманлыҡ, ҡыйыулыҡ һәм Ватанға сикһеҙ бирелгәнлек. Ә был сарала ошо һүҙҙәрҙең бөтәһе лә йәнләнеп, музыкаға, йылмайыуҙарға, ғорур торошҡа һәм күҙҙәрҙәге ялҡынға әйләнгән мәл булды.

Башҡортостан Республикаһы Башлығы Радий Фәрит улы Хәбиров менән осрашыу был көндөң иң мөһим ваҡиғаларының береһе булды. Уның һүҙҙәре Миңлеғәле Шайморатовтың иҫтәлегенә тәрән ихтирам менән һуғарылғайны.

• Генерал Шайморатовтың яҙмышы һоҡланғыс. Башҡортостан, республикабыҙ өсөн ғорурлана алырҙай геройҙарыбыҙ булыуы ҙур бәхет. Тап ошо маҡсат менән беҙ үҙ ваҡытында “Йәш шайморатовсылар” кластарын астыҡ. Улар хәрби тарихты өйрәнергә, республикабыҙҙың һәм илебеҙҙең ысын патриоттары булырға теләгән балаларҙы берләштерә. Йәш шайморатовсы булыу – ул айырым яуаплылыҡ. Уның исеме ғүмерегеҙ буйына һеҙҙе оҙатып барыр. Яҡшы уҡырға, яңы белемгә ынтылырға, спорт менән шөғөлләнергә, әлбиттә, патриот булырға кәрәк. Был көн һеҙҙең хәтерегеҙҙә, ата-әсәйегеҙҙең, уҡытыусыларығыҙҙың хәтерендә ҡалыр тип ышанам. Барығыҙға ла уңыштар, тыныслыҡ, именлек һәм тыуған Башҡортостаныбыҙҙың сәскә атыуын теләйем, - тине Радий Хәбиров сығыш яһап.

Ул шулай уҡ 11 уҡыусыға “Йәш шайморатовсы” почет билдәләрен тапшырҙы. Шайморатовсылар композитор Урал Иҙелбаев көйөнә башҡорт вальсын һәм Рим Хәсәновтың “Ҡышҡы романс” (“Ҡышҡы романс”) көйөнә вальс бейене.

Беҙгә шундай күләмле һәм сағыу байрамда ҡатнашырға  мөмкинселек булдырған гимназия етәкселегенә, класс етәксебеҙгә һәм тәрбиәсебеҙгә ышаныстары һәм, әлбиттә, ысын Геройҙың исемен йөрөтөүҙең юғары хөрмәте өсөн рәхмәтлебеҙ.

Илнара ДАУЫТОВА,

Нияз Мәжитов исемендәге Красноусол башҡорт гимназия-интернатының 9 “А” класс уҡыусыһы.