Редакциябыҙҙа осрашыу

Мөнир Сәхиулла улының тыуған яғына сәфәренең маҡсаты ла бик изгенән ине. Иң тәүҙә ул, Өфөләге ғафуриҙарҙың “Табын” яҡташтар берлеге рәйесе булараҡ,  район хакимиәтендә булып, яңы эш башлаған район хакимиәте башлығы Венер Фәнир улы Вахитов менән осрашып, байтаҡ мәсьәләләрҙе уртаға һалып һөйләшкән.

Редакцияла иһә уны районыбыҙҙың билдәле сәсәниәләре көтә ине. “Ағиҙел” журналы редакцияһы уҙғарған шиғри онлайн-конкурста тәүге өс урынды тап беҙҙең район авторҙары яулаған: 1-се урынға – билдәле Алтынбикә сәсәниә – Фәүзиә Ҡотлогилдина, 2-се – Фәниә Фәйзуллина һәм 3-сө урынға Рима Рафиҡова лайыҡ булған. (Бында үҙебеҙҙекеләргә дәррәү генә тауыштар йыйған райондаштарыбыҙға ла ҙур рәхмәт әйтергә кәрәктер).

Мөнир Сәхиулла улы еңеүселәрҙең һәр береһенә “Ағиҙел”дең дипломдарын һәм иҫтәлекле бүләктәрен тапшырҙы. Артабан “Табын” журналистары менән бергә йәнле һөйләшеү үтте. Мөнир Ҡунафиндың Махсус хәрби операцияла хеҙмәт иткән яугирҙар янына бер нисә тапҡыр барып ҡайтҡанын, улар һөҙөмтәһе булараҡ күләмле очерктар яҙғанын беләбеҙ. Ошо темаға пьеса ла ижад иткән, уны Милли йәштәр театры ҡуйырға әҙерләүен белдек. Шағирҙар йыйылған ерҙә шиғырҙар уҡылмаһа, дөрөҫ булмаҫ ине. Етеп килгән Башҡорт теле көнөнә арнап, шиғырҙар уҡыныҡ, уларҙы видеоға төшөрҙөк, ижади пландар менән уртаҡлаштыҡ.