Башҡортостанда Шәйехзада Бабичтың 130 йыллығын билдәләнеләр

Шағир тыуып үҫкән Мишкә районының Кигәҙетамаҡ ауылында күп йылдар инде Шәйехзада Бабич исемендәге музей эшләй. Был урын уның ижадын һөйөүселәрҙе генә түгел, шағирҙың вариҫтарын да йәлеп итә. Уларҙың күптәре әле һаман ауылда йәшәй. Ошо ҙур булмаған, әммә уңайлы музейҙа Бабичтар ғаиләһенең ҡомартҡылары, уникаль экспонаттар һәм боронғо шәжәрәләр ҡәҙерләп һаҡлана. Тарихи мираҫтың һаҡланыуын тыуған яҡты өйрәнеүселәр, туғандар һәм урындағы халыҡ күҙәтә. Музейға Әлфиә Зарипова етәкселек итә, ул был ваҡиғаның әһәмиәтен һыҙыҡ өҫтөнә алды: юбилей Бабичтың вариҫтарын тотош республиканан һәм илдән йыйҙы, ә музей үҙе тамырҙар менән бәйләнеште яңынан тойорлыҡ урын булып ҡала. Йылдан-йыл ҡунаҡтар араһында шағирҙың ижадына ҡыҙыҡһыныу белдергән йәштәрҙең күбәйеүе айырыуса ҡыуандыра. Тантанаға шағирҙың туғандары ғына түгел, «Башинформ» агентлығы журналистары ла килгәйне, улар музейға заманса оргтехника тапшырҙы. «Ростелеком» да мөһим бүләк эшләне - учреждениены интернетҡа тоташтырҙылар. Компанияның техник директоры Илгиз Баекенов билдәләүенсә, был Бабичтың әҙәби мираҫын таратыуҙа ярҙам итәсәк һәм уның ижадын өйрәнеү өсөн яңы мөмкинлектәр асасаҡ. Юбилей уңайынан Башҡортостандың Яҙыусылар союзы, Матбуғат агентлығы һәм «Китап» нәшриәте музейға ҡиммәтле китаптар тапшырҙы. Тантаналы саранан һуң музейҙағы байрам Мишкә районы үҙәгендә дауам итте.

Кино һөйөүселәр өсөн «Бабич» фильмын күрһәтеү ойошторолдо, ә уҡыусылар уны төшөрөүселәр һәм Йәштәр театры актеры, бөйөк шағир ролен башҡарыусы Илгиз Таһиров менән осраша алды. Башҡортостан Яҙыусылар союзы рәйесе Айгиз Баймөхәмәтов билдәләүенсә, Бабичтың ижады, ҡыҫҡа тормош юлына ҡарамаҫтан, башҡорт әҙәбиәте үҫешенә ҙур йоғонто яһаны һәм республиканан ситкә сыҡты.

Мишкә районы хакимиәте башлығы Павел Трапезников шағирҙы яҡлаған һәм уның иҫтәлеген һаҡлағандарҙың барыһына ла рәхмәт әйтте. Абруйлы ҡунаҡтар араһында Бөтә донъя башҡорттары ҡоролтайы, милли берекмәләр, әҙәби журналдар вәкилдәре һәм танылған яҙыусылар булды. Шәйехзада Бабичтың тыуыуына 130 йыл тулыуға арналған юбилей саралары 2025 йыл буйына дауам итә, тип яҙа «Молодежная газета» баҫмаһы.

Фото: «Башинформ».