53-сө Халыҡ-ара балалар уйындары башланды

Йәш спортсылар 9 Олимпия спорт төрө: еңел атлетика, йөҙөү, фехтование, грек-рим көрәше, дзюдо, мини-футбол, 3х3 баскетбол, пляж волейболы һәм ҡаяға үрмәләү буйынса көс һынашасаҡ. 12-нән 15 йәшкә тиклемге спортсылар өсөн был ярыштар ҙур спортҡа илтеүсе юл, донъя күләмендәге ярыштарға әҙерлек, тиҫтерҙәре менән аралашып, тәжрибә туплау мөмкинлеге лә булып тора.

Халыҡ-ара Балалар уйындары комитеты менән бергә Өфөгә был уйындарға нигеҙ һалыусы Метод Клеменц киләсәк. Тап ул 1968 йылда Югославияның Целе ҡалаһында тәүге Халыҡ-ара балалар уйындары уҙғара һәм башланғыс донъяла ҙур яҡлау табып, бөгөнгәсә дауам итә, үҫешә.