Ҡыуатов исемендәге республика клиник дауаханаһы - карантинда

Социаль селтәрҙәге сәхифәһендә Башҡортостан Башлығы Радий Хәбиров дауахана пациенты - 80 йәшлек ҡатын йәкшәмбе донъя ҡуйыуы тураһында хәбәр итте. Ул ике ай дауамында ишемия инсультынан һәм шәкәр диабетынан дауаланған.

Үлгәндән һуң уға коронавирусҡа анализ яһалған. Бөгөн уның ошо инфекция менән зарарланған булыуы асыҡланған. “Пациент коронавирустан үлмәгән. Әммә был осраҡтан һуң, махсус хеҙмәттәр хәүефһеҙлек саралары күрергә бурыслы. Ауырыу менән бәйләнештә булыусыларҙың барыһы ла Республика клиник дауаханаһында карантинда ҡалырға тейеш. Быны кешеләрҙең һаулығы һәм ғүмерен һаҡлап ҡалыу өсөн ҡаралған закон талап итә”, - тип яҙған Радий Хәбиров.