Башҡорт теленән халыҡ-ара диктант үтте

Бөгөн Башҡортостан юлдаш телевидениеһы, Интернет селтәре аша онлайн форматта башҡорт теленән халыҡ-ара диктант яҙыу үтте. Мульти музыка ҡоралдары эйәһе, шоумен Заһир Зәйнетдинов тексты башҡорт

телендә башланғыс белеме булғандар өсөн уҡыны. Танылған диктор, “Хәбәрҙәр” тапшырыуын алып барыусы Флүрә Мурзина башҡорт телендә иркен аралашҡан аудиторияны текст менән таныштырҙы.

Ә инде яҙыусы Марсель Сәлимов тесты үҙе һөйләшеп үҫкән төньяҡ-көнбайыш диалектында уҡып ишеттерҙе.

Красноусолдағы 3-сө мәктәптең башҡорт теле уҡытыусылары Дилә һәм Азамат Абдуллиндар bashkdictant.ru сайты аша теркәлеү үткәндән һуң, диктантты Интернет селтәре аша яҙған.

Красноусол ағинәйҙәре диктантты башҡорт милли кейемендә яҙып, фотоларын үҙ төркөмдәренә ҡуйғандар.

Башҡорт телендә иркен аралашҡандар өсөн уҡылған текст Әхтәм Ихсандың “Саҡма тояҡ аттарҙа” документаль повесынан өҙөк булды. Бөйөк Ватан һуғышы яугиры Әхтәм Ихсан 112-се Башҡорт атлы дивизияһының «Ҡыҙыл атлылар» гәзитендә мөхәррир урынбаҫары була. Һуғыштан ҡайтҡас, республика радиокомитетында, «Башҡортостан ауыл хужалығы» журналы редакцияһында эшләй.

Әхтәм Ихсан 1960 йылда яҙған повесында элекке яуҙаштарының дошманға ҡаршы нисек һуғышыуын ышандырырлыҡ итеп һүрәтләй.