Коронавирусҡа бәйле һуңғы мәғлүмәттәр

Республиканың Һаулыҡ һаҡлау министрлығы үткәргән сираттағы онлайн брифингта төбәктә коронавирусҡа бәйле һуңғы мәғлүмәттәр иғлан ителде.

Һаулыҡ һаҡлау министры Максим Забелин әйтеүенсә, Башҡортостанда һуңғы тәүлектә тағы ла 92 кешелә COVID-19 вирусы асыҡланған. Сирлеләрҙең дөйөм һаны – 2247. Һауыҡҡандар – 714 (һуңғы тәүлектә 45 кеше өҫтәлгән). Вафат булғандарҙың дөйөм һаны – 17. Республика стационарҙарында 652 сирле дауалана, ҡалғандар – амбулатор шарттарҙа.

Онлайн брифингта Гигиена һәм эпидемиология үҙәгенең баш табибы Анна Казак республикала эшләгән лабораториялар һаны менән таныштырып үтте. Әлеге ваҡытта төбәктә дүрт федераль ҡарамаҡтағы лаборатория эшләй: икәүһе Гигиена һәм эпидемиология үҙәгенә, ҡалғандары Башҡортостан дәүләт медицина университетына һәм Федераль яза башҡарыу идаралығына ҡарай.

Унан тыш, Һаулыҡ һаҡлау министрығы ҡарамағындағы – 11, дүрт шәхси лаборатория эшләй. Һуңғы тәүлектә 6033 тикшереү үткәрелгән. Дөйөм һандарға килгәндә, ошо көнгә тиклем 157 325 кеше коронавирусҡа тикшерелгән, уларға йәмғеһе 166 490 тикшереү үткәрелгән. Был сик түгел – лаборатория ҡәеүәттәрен артабан арттырасаҡтар, тине Анна Казак.

Рәсәйҙә иһә 299 941 кеше коронавирус менән сирләй, һуңғы тәүлектә был ауырыу йоғоуҙың 9263 осрағы теркәлгән. Бөтәһе 76 130 пациент һауыҡҡан, 2 837 кеше вафат булған.