Эш урындары булдырыласаҡ

Башҡортостан Башлығы Радий Хәбиров социаль селтәрҙәр аша шатлыҡлы ваҡиға менән уртаҡлашты. Ошо көндәрҙә махсус социаль-иҡтисади үҫеш биләмәһе (ТОСЭР) булған Благовещенда яңы ике резидент барлыҡҡа килгән.

“Уларҙың береһе кешеләр йәшәгән биләмәләрҙе автомобиль магистралдәренән килгән тауыштан һаҡлаған экрандар етештерә. Икенсеһе – кейем тегеү буйынса предприятие. Дөйөм алғанда был проекттар ҡалала 114 яңы эш урыны булдырасаҡ. Потенциаль инвесторҙарға был ташламалы шарттарға иғтибар итергә саҡырам. (Сайт ТОСЭР.). Йәнә шуны ҡабатлайым – эпидемия килә лә китә, беҙ бизнесҡа ярҙам итеү темптарын кәметмәйәсәкбеҙ”, – тип яҙып сыҡты төбәк етәксеһе социаль селтәрҙәрҙә.

“Башинформ” мәғлүмәт агентлығы хәбәр итеүенсә, бөгөн Благовещен ТОСЭР-ында биш резидент теркәлгән. Уларҙың дөйөм инвестиция күләме 1,77 миллиард һум тәшкил итә. Яңы производстволарҙа 375 яңы эш урыны барлыҡҡа килә.

2020 йыл башына Башҡортостандың ТОСЭР резиденттары 2,4 миллиард һумлыҡ инвестиция индергән, 1,6 меңдән ашыу эш урыны булдырған. Әлеге ваҡыта республикала биш ошондай биләмә бар. Уларҙың өсәүһе былтыр февралдә – Благовещенда, Белоретта һәм Нефтекамала булдырылды.

Фото: Радий Хәбировтың сәхифәһенән.