“ФормART” проектында ҡатнашығыҙ

Рәсәй Президентының Волга буйы федераль округындағы тулы хоҡуҡлы вәкиле Игорь Комаровтың башланғысы менән округта урам сәнғәтен үҫтереүгә йүнәлтелгән “ФормART” проекты тормошҡа ашырыла башланы.

Стрит-арт фестиваленең маҡсаты – йәш рәссамдар ижадына булышлыҡ итеү, округ төбәктәрендә граффити сәнғәте ярҙамында заманса ҡала мөхите һәм өр-яңы мәҙәни кодтар булдырыу. Төп темаһы – коронавирусҡа ҡаршы көрәштә берҙәмлек, һәр кеше роленең әһәмиәте.

Проектта Волга буйы федераль округында йәшәгән 16 – 35 йәшлек һөнәри стрит-арт рәссамдары, һәүәҫкәр рәссамдар ҡатнаша ала. Бының өсөн Formartpfo.ru сайты аша ғариза бирергә кәрәк. Һайлап алыу этабында ғаризалар 7 авгусҡа тиклем ҡабул ителә. Эштәрҙе компетентлы жюри баһалай. Финалға сыҡҡандар округтың һәр төбәгендәге билдәле биналарҙың стенаһында художестволы ниәттәрен сағылдыра ала, шулай уҡ ижадты үҫтереүгә 50-100 мең һум күләмендә аҡсалата грантҡа дәғүә итәсәк.

Ҡала мөхите объекттары стенаһында ижад барышын сағылдырған фотолар һәм видеояҙмалар проекттың сайтында урынлаштырыла, ә фестивалдең еңеүсеһе быйыл октябрҙә тауыш биреү юлы менән йәмәғәтселек билдәләйәсәк.

Фото: formartpfo.ru