Халыҡ өсөн эшләһендәр

Һайлау һөҙөмтәләренә килгәндә, “Берҙәм Рәсәй” партияһының еңеүе уға халыҡтың ышаныуын белдерәлер тип уйлайым. Беҙҙең ауыл миҫалында ғына ла “Берҙәм Рәсәй” партияһының “Аныҡ эштәр” программаһы буйынса бик күп ярҙамдарын күрҙек. Ауылыбыҙға мәҙәниәт усағы юллап алғас, музыкаль аппаратура, сәхнә, ноутбук тап ошо программа аша алынды. Бында элекке депутатыбыҙ Әмир Миңнеәхмәт улы Ишемғоловтың (хәҙер мәрхүм инде) ярҙамы ҙур булды.

Башҡортостаныбыҙҙан Дәүләт Думаһына һайланған депутаттарыбыҙ хеҙмәт ветерандарын, өлкәндәрҙе, аҙ тәьмин ителгән ғаиләләрҙе социаль яҡлауға иғтибар итһендәр тигән теләгем бар. Мәҫәлән, коммуналь түләүҙәргә ташламалар булдырылһын, Рәсәй кимәлендәге пенсионерҙарға өҫтәмә түләүҙәр кәметелмәһен ине. Халҡыбыҙ өсөн бар көстәрен һалып эшләрҙәр тип ышанам.

Башҡортостан Башлығы Радий Хәбиров командаһына республикабыҙҙың иҫ киткес матур тәбиғәтен, туған телебеҙҙе, мәҙәниәтебеҙҙе, бай тарихыбыҙҙы һаҡлау, уны донъяға танытыу йүнәлешендә эшләүҙәрен теләр инем. Балалар баҡсаларында, мәктәптәрҙә туған тел дәрестәре һаны артһын ине. Сөнки балаларыбыҙ үҙ телен белеп, ошо телдә фекерләп, ижад итеп үҫергә тейеш. Шул ваҡытта ғына улар Ватаныбыҙҙың ысын илһөйәрҙәре булы үҫәсәк.