Ирекмәндәр ярҙамға килер

“Берҙәм Рәсәй” башҡарма комитеты ҡарамағындағы колл-үҙәк 65 йәштән өлкәндәрҙән, хроник сирлеләрҙән, ярҙамға мохтаж ауырлы ҡатындарҙан аҙыҡ-түлек килтереү буйынса заявкалар ҡабул итә.

Республиканың һәр ҡала һәм районында “Беҙҙең хәстәрлек” берҙәм ирекмәндәр үҙәге Йәштәр сәйәсәте министрлығы менән бергә эш башланы. Ирекмәндәр автомобилдәрҙә изоляцияла ултырғандарға дарыуҙар һәм аҙыҡ-түлек килтереүҙе үҙ өҫтөнә ала. Шулай уҡ поликлиникаға прививка яһатырға барырға теләгәндәргә ярҙам күрһәтеләсәк. Телефон: 8-800-201-89-03. Сәғәт иртәнге 9-ҙан киске 6-ға тиклем шылтырата алаһығыҙ.

Районда халыҡҡа ярҙам итеү маҡсатында оператив ирекмәндәр штабы үҙ эшен тергеҙҙе. Бөтәһе районда 50 ирекмән эшләй. Социаль селтәрҙәрҙә  халыҡҡа, шул иҫәптән 65 йәштән өлкәндәргә һәм үҙ-үҙен хеҙмәтләндерә алмаған граждандарға ярҙам күрһәтеү өсөн ирекмәндәр йыйыу тураһында постар ҡуйылған.

Әлеге көнгә Сәйетбаба ауылынан бер ирекмән теләк белдерҙе, кеше йыйыу дауам итә. Штаб ҡарамағында 4 шәхси һаҡланыу сараһы, 200 дана битлек, 5 литр дезинфекция саралары бар. Халыҡтан ярҙам күрһәтеүҙе һораған заявкалар әлегә юҡ. Әгәр ярҙам кәрәкһә, ирекмәндәр өсөн район хакимиәтенең транспорты ҡулланыласаҡ.

Былтыр беҙгә үҙаллы 20 ирекмән, уларҙың 3-һе үҙ транспорты менән  ярҙамға килгәйне.

Район хакимиәтендә ойошторолған оператив штабы телефоны: 8(34740) 2-12-96.  Ярҙамға мохтаждар ошо телефонға шылтыратып заявка ҡалдыра ала.