Сәләмәтлеккә бер аҙым

15 сентябрҙә Ҡотлоғужа ауылына биҙәк өҫтәп, төрлө сағыу төҫтәр менән балҡып, тирә-яҡҡа йәм биреп торған был өр-яңы заманса майҙансыҡты асыу тантанаһы булды.
Тантаналы сарала район хакимиәте башлығының иҡтисади мәсьәләләр бу-йынса урынбаҫары Ирина Небогатова, район башлығының эшҡыуарлыҡ буйынса урынбаҫары вазифаһын башҡарыусы Артур Ғафаров, район хакимиәтенең иҡтисади үҫеш бүлегенең сектор мөдире Альбина Мөхәмәтйәнова, Бельский ауыл биләмәһе башлығы Юнир Әхмәров, проект авторы Марат Кәримов, ауыл кешеләре, балалар ҡатнашты һәм тамаша ҡылды.
Йола буйынса ал таҫманы Юнир Зиннур улы, Ирина Анатольевна һәм Марат Фәнир улы киҫеп, майҙансыҡты асыҡ тип иғлан иткәс, барыһы ла уның эсенә үтте.
Алып барыусы Гөлнара Ғафарова тәүге һүҙҙе Ирина Небогатоваға бирҙе.
- Был матур уйын майҙансығында балалар ихлас уйнаясаҡ. Коммерцияға ҡарамаған ойошманы күтәреп алып, ярҙам иткәне өсөн ауыл биләмәһе хакимиәтенә ҙур рәхмәт. Беҙҙең район һуңғы ике-өс йылда ошондай 82 проект менән еңеү яулап, районға 63 миллион һумдан ашыу аҡса йәлеп ителде. Район өсөн был ҙур һандар. Был проект ярҙамында ошондай матур майҙансыҡтар асыла, компьютер кластары, китапханалар яңыртыла һәм башҡа бик күп мөһим эштәр башҡарыла. Бергәләп ошондай программаларҙы тормошҡа ашырайыҡ, дәүләт ярҙамын ҡулдан ысҡындырмайыҡ. Тағы ла яңынан-яңы тәҡдимдәр һәм ҡыҙыҡлы идеялар тыуһын һәм иң мөһиме, артабан да проекттар менән ҡатнашып, еңеүҙәр яуларға яҙһын, - тигән теләктә ҡалды Ирина Анатольевна. Һәм З.Йәнбәкова менән Ю.Әхмәровҡа район хакимиәтенең Рәхмәт хаттарын тапшырҙы.
Ауыл хакимиәте башлығы Юнир Зиннур улы ауылдаштарын һәм килгән ҡунаҡтарҙы тәбрикләп: “Балаларыбыҙ һау-сәләмәт булып үҫһен өсөн ошо майҙансыҡты булдырҙыҡ. Һәр кем ҡулынан килгәнсә үҙ өлөшөн индереп, Президент фонды гранты конкурсында әүҙем ҡатнашҡанлыҡтан был майҙансыҡ ҡалҡып сыҡты. Майҙансыҡ балалар өсөн генә түгел, бында шулай уҡ өлкәндәргә лә спорт менән шөғөлләнеү мөмкин буласаҡ. Ҡәҙерләп, һаҡсыл ҡарашта булып, шатланып файҙаланырға кәрәк. Был программа туҡтап ҡалмаһын, артабан да үҫешһен. майҙансыҡта киләсәктә футбол һәм волейбол майҙансыҡтары ла буласаҡ. Район хакимиәте башлығы Ф.Ф.Сыңғыҙовҡа, прог-рамма етәксеһе И.А.Небогатоваға, район хакимиәтенең иҡтисади үҫеш бүлегенә, проектты булдырған төркөмгә һәм Ҡотлоғужа ауылы халҡына ҙур рәхмәт”, - тине һәм майҙансыҡты эшләүҙә әүҙем ҡатнашҡан, тос өлөш индергән бер төркөм ауыл уңғандарына рәхмәт һүҙҙәрен еткереп, Рәхмәт хаттары һәм иҫтәлекле бүләктәр тапшырҙы.
Артабан Бельский ауыл биләмәһенең иҡтисади үҫеш фонды – коммерцияға ҡарамаған ойошмаһының “Сәләмәтлегеңде беҙҙең менән арттыр” проекты етәксеһе Марат Кәримов тәбрик һүҙҙәрен еткерҙе һәм бер төркөм әүҙемдәр уның ҡулынан Рәхмәт хаттары һәм бүләктәр алып, ҙур ҡыуаныс кисерҙе. Ауыл имамы рәхмәт һүҙҙәрен һәм ихлас теләктәрен белдерҙе.
Сарала уҡыусы балалар шиғырҙар һөйләне, байрамды Дилара Мәүлетованың йыры, Әлиә Йәнбәкова менән Тимерлан Рәхмәтуллин башҡарған бал бейеүе биҙәне.
Байрамда мәҙәниәт йорто хеҙмәткәрҙәре балалар өсөн төрлө күңелле уйындар ойошторҙо. Ҙур кәүҙәле әкиәт геройҙарының да ҡатнашыуы йыйылыусыларҙың кәйефтәрен тағы ла күтәреп ебәрҙе, улар менән кинәнеп фотоға төштөләр. Сара тәмле былауҙан ауыҙ итеп, һыйланыу менән тамамланды.
Киләсәгебеҙ булған балаларҙың бала сағы матур, күңелле, һау-сәләмәт үтһен. Балалар уйын майҙансығы һәр ваҡыт гөрләп торһон.