Халыҡҡа яҡын тороусылар

Бер быуатлыҡ тарихы булған участковыйҙар хеҙмәтендә эшләүселәрҙең вазифалары төрлө дәүерҙә төрлөсә аталһа ла, төп бурыстары үҙгәрешһеҙ ҡала. Участка уполномоченныйҙарының көндәлек хеҙмәте ҡатмарлы һәм күп яҡлы. Бер яҡтан, тәүәккәллек, һөнәри оҫталыҡ, сетерекле хәлдәрҙә юғалып ҡалмауҙы талап итеп, енәйәт ҡылыусылар менән көрәште үҙ эсенә алһа, икенсенән, уларҙың бурысы кешеләр именлеге хаҡында даими хәстәрлек күреү. Ауыр тормош хәлендә ҡалған кешегә ярҙам итеү, закон сигенән үтергә юл ҡуймау был хеҙмәттә эшләүселәрҙең төп бурыстары булып ҡала. Шуға ла участковыйҙар - халыҡҡа иң яҡын тороусылар булып иҫәпләнә, уларҙың эш урындары ла кешеләр араһында.
Бүлексәнең 10 айлыҡ эш һөҙөмтәләренә килгәндә, участка уполномоченныйҙары тарафынан 92 енәйәт асылған, хоҡуҡ боҙоуҙар буйынса 400-ҙән ашыу административ протокол төҙөлгән.
Бөгөн район эске эштәр бүлегенең полиция майоры Ирек Әхмәт улы Хәсәнов етәкселегендә (был вазифаға октябрҙә тәғәйенләнә) участка уполномоченныйҙары һәм бәлиғ булмағандар эштәр буйынса бүлексәһендә 8 участковый һәм ике инспектор эшләй. Һәр ҡайһыһына биләмәләр бүлеп бирелгән. Түҙемлек, сабырлыҡ, физик яҡтан әҙерлек, шул уҡ ваҡытта кешеләрҙең психологияһын белеүҙе талап иткән участка уполномоченныйы һөнәрен үҙ итеүселәр: Сәйетбаба ауыл биләмәһен - участка уполномоченныйы полиция подполковнигы Илшат Кинйәбулатов (Имәндәш, Бурлы ауыл биләмәләре лә ваҡытлыса уға беркетелгән), Аҡкүл ауыл биләмәһен - полиция капитаны Александр Кос-тин, полиция капитаны Айҙар Әбделмәнов (Еҙем-Ҡаран, Ҡауарҙы ауыл биләмәләре), полиция өлкән сержанты Илмир Сәйғафаров (Яңғыҙҡайын, Үтәк, Буруновка, Мораҡ, ә Ташбүкән, Ташлы, Толпар ауыл биләмәләре ваҡытлыса беркетелгән), Красноусол ауыл биләмәһендә Новосёлка биҫтәһен (ваҡытлыса Һамар биҫтәһен дә) полиция лейтенанты Илшат Мөхәмәтйәнов, полиция лейтенанты Артур Ҡунафин (Үҙәк), Дауахана ҡаласығын ваҡытлыса), полиция лейтенанты Илвина Шәйәхмәтова (Курорт, Умартасылыҡ хужалығы, Балалар шифаханаһы), полиция лейтенанты Файруза Аҡҡужина Табын ауыл биләмәһен хеҙмәтләндерә. Дүрт участка уполномоченныйы етешмәй. Теләге булғандарҙы эшкә саҡыралар.
Район эске эштәр бүлегенең участковый-ветерандарынан Ф.Ғ.Фәхретдинов, Р.З.Заһиҙуллин, М.М.Шәйәх-мәтов, Н.С.Ҡунафин, Ә.С.Йосопов, Н.И.Петров, Ә.Ғ.Бохармәтов, С.К.Ишкин, Ә.С.Ғайсин, А.Ә.Аралбаев, А.Т.Әмерханов, Ғ.Ғ.Суфиянов һәм башҡаларҙы билдәләп үтергә кәрәк.
Етәкселек барлыҡ коллективты һөнәри байрамдары уңайынан ҡотлап, еңел булмаған хеҙмәттәрендә уңыштар, иҫәнлек-һаулыҡ теләй.