Ғафури уҡыусылары Еңеүҙе яҡынайтыуға үҙ өлөшөн индерә

Мәҫәлән, Рәсәй Геройы Ф.А.Яҡупов исемендәге Бурлы мәктәбе "Үҙебеҙҙекеләрҙе ташламайбыҙ!" акцияһында әүҙем ҡатнаша. Уҡыусылар, ата-әсәләр, уҡытыусылар, мәктәп хеҙмәткәрҙәре һәм урындағы халыҡ ҙур ярҙам күрһәтә, ҡыҫҡа ваҡыт эсендә күп һанлы гуманитар ярҙам йыйылған: аш-һыу (тоҙло консервалар, варенье, бал), йылы ойоҡбаш, бирсәткәләр, махсус кейем, сәй, тәм-том, шәхси гигиена саралары һәм башҡа кәрәкле әйберҙәр.

Мәктәп хеҙмәткәрҙәре мәктәп яны участкаһында үҫтерелгән йәшелсәләрҙән 130 банка йәшелсә тоҙлаған, шулай уҡ бөтәһе 230 банка варенье әҙерләгән. Йыйылған посылкалар Ирекмәндәр штабына тапшырылды.

Гуманитар ярҙам йыйыуҙан тыш, Красноусол ауылының 3-сө мәктәбе уҡыусылары тәрбиә буйынса кәңәшсеһе К.Ю. Желтова һәм тәрбиә эштәре буйынса завуч Ю. А. Исламова етәкселегендә окоп шәмдәре эшләй. Уларҙы һалдаттар ялан шарттарында аш-һыу әҙерләү өсөн ҡуллана. 

Балалар өйҙән ҡалай банкалар алып килә һәм уҡытыусылар менән бергә уларҙы ҡатырға менән тултыра. Дөйөм алғанда, берлектәге тырышлыҡ менән 40-ҡа яҡын дана эшләгәндәр. Бөтә шәмдәр ҙә ирегән балауыҙ менән тултырыла.  Шәмдәр банканың күләменә ҡарап ике сәғәттән алты сәғәткә тиклем яна, төтәмәй. Һалдаттарға окоп шәмдәре бик кәрәк, уларҙың һаулығын һаҡлап ҡалырға һәм һуғыш рухын күтәрергә ярҙам итә.