“Табын” дуҫтарын йыйҙы

Тәүҙә “Табын” гәзите мөхәррире Гөлдәр Барый ҡыҙы Кинйәбаева үҙ сығышында барыһын да Милли кейем көнө менән ҡотланы. Район гәзите менән оҙаҡ йылдар әүҙем хеҙмәттәшлек иткән ауыл хәбәрселәренә рәхмәт әйтеп, һуңынан гәзиттең Нәжметдин Фәрхшатов исемендәге премияһының 2023 йыл лауреаты Фәниә Әкрәм ҡыҙы Фәйзуллинаға махсус Диплом һәм “Йыл кешеһе – 2023” тип билдәләнеүселәргә дипломдар тапшырып үтте. Хаттар бүлеге мөдире Әлфиә Вәлиева редакцияға килгән хаттарға байҡау яһап үтте, әүҙемерәк яҙышырға саҡырҙы, иң актив хәбәрселәрҙе барланы. 

“Түңәрәк өҫтәл” артында күрешмәгәнгә байтаҡ булып киткәнгәме, һөйләшеү бик йәнле һәм фәһемле булды. "Табын" артабан да телебеҙҙе, мәҙәниәтебеҙҙе, милли асылыбыҙҙы, йола, ғөрөф-ғәҙәттәребеҙҙе һаҡлап ҡалған уҡымлы баҫма булып ҡалһын, тиражы артһын тигән теләктәр әйтелде. Был осрашыу Башҡортостан Республикаһы халыҡтарының Милли кейеме көнөнә тура килгәнлектән, барыһы ла милли кейемдә килеп, һуңынан сағыу кейемдәрҙә иҫтәлеккә фотоға ла төштөк.