Етди мәсьәләләр тикшерелде

Семинарҙа мәртәбәле ҡунаҡтар араһында БР Хөкүмәте Премьер-министры урынбаҫары – БР ауыл хужалығы министры Илшат Фазрахманов, Рәсәй Федерацияһы Дәүләт Думаһы – Федераль Йыйылышы депутаты Римма Үтәшева, БР Дәүләт Йыйылышы – Ҡоролтайҙың аграр мәсьәләләр, экология һәм тәбиғәттән файҙаланыу бу-йынса комитет рәйесе Илшат Вазигатов, Ветеринар һәм фитосанитар күҙәтеү Федераль хеҙмәтенең БР буйынса идаралығы етәксеһе Руслан Байкеев, Удмурд Республикаһының Баш ветеринария идаралығы начальнигы Роман Ғабдрахманов, Мәскәү ҡалаһының Ветеринария комитеты рәйесе урынбаҫары Елена Авдеева, Мәскәү ҡалаһы Ветеринария комитетының хайуандар менән мөғәмәлә өлкәһендә күҙәтеү буйынса дәүләт инспекцияһы начальнигы урынбаҫары Анна Агафонова, Башҡорт дәүләт аграр университетының биотехнология һәм ветеринария медицинаһы факультеты деканы Георгий Базекин, БР Ветеринария идаралығы начальнигы Азат Йыһаншин, БР Ветеринария буйынса Дәүләт комитеты ҡарамағындағы йәмәғәт советы рәйесе Фәрит Шәйнуров, “Регагро” компанияһы төркөмөнөң генераль директоры Сергей Шерстобоев, БР Дәүләт Йыйылышы – Ҡоролтай депутаты, “Красноусол” шифаханаһы директоры Рәмил Бәҙретдинов, район хакимиәте башлығы Фәнзил Сыңғыҙов, район Советы рәйесе, район ветеринария станцияһы начальнигы Фаил Зәйнетдинов һәм башҡалар бар ине.
Пленар өлөш башланырҙан алда ҡунаҡтар Рәсәй Федерацияһы Дәүләт флагы көнөнә арналған тантаналы сарала, һуңынан ветеринария хеҙмәте ветераны, райондың элекке баш ветеринар табибы Фәнил Сәйет улы Юлдашев иҫтәлегенә мемориаль таҡтаташ асыуҙа ҡатнашты. Шулай уҡ сарала ҡатнашыусылар Бөйөк Ватан һуғышында ҡатнашҡан район ветеринарҙарына арналған һәйкәлгә сәскәләр һалды.
Артабан республиканың ветеринария тармағы белгестәре район хакимиәтенең ҙур залында йыйылды, унда “түңәрәк өҫтәл” сиктәрендә асыҡ һәм конструктив диалогта илдәге һәм төбәктәге дәүләт ветеринария учреждениеларының дәүләт заданиеһын үтәү һәм эпизоотияға ҡаршы сараларҙы, хайуандарҙың айырыуса хәүефле ауырыуҙарын иҫкәртеү, матди-техник база торошо һәм башҡа мәсьәләләрҙе уртаға һалып тикшерҙе.
Республика семинары ҡунаҡтарын һәм ҡатнашыусыларҙы сәләмләп, район хакимиәте башлығы Ф.Сыңғыҙов Ғафури районында агросәнәғәт комплексындағы хәл-торош менән таныштырҙы. Районда ветеринария хеҙмәте эшмәкәрлеге тураһында район ветеринария станцияһы начальнигы Ф.Зәйнетдинов сығыш яһаны.
Сығыш яһаусыларҙың һәр ҡайһыһы ветеринария өлкәһе хеҙмәткәрҙәрен етеп килгән һөнәри байрамдары менән тәбрикләп, һәр сығышта ветеринария хеҙмәтенең хайуандарҙы ғына дауаламауы, ә бөтөн кешелек сәләмәтлеге һағында тороуы ҡыҙыл еп булып үтте.
Лайыҡлылар төрлө кимәлдәге юғары наградалар - Маҡтау грамоталары һәм Рәхмәт хаттары менән бүләкләнде. Улар араһында ғафуриҙар ҙа бар: район ветеринария станцияһының эпизоотияға ҡаршы бүлектең баш ветеринар табибы Елена Новикова, Аҡкүл ветеринар участкаһы лечебницаһы мөдире Михаил Икшигулов, ветеринария хеҙмәте ветераны, район ветеринария станцияһы ветерандар ойошмаһы рәйесе Эльвира Степанова.
Артабан төбәктең ветеринария хеҙмәткәрҙәре араһында йыл да уҙғарылған конкурсҡа йомғаҡ яһалды. Был ветеринария өлкәһендә йолаға әүерелгән “Һөнәре буйынса иң яҡшы” конкурсы республикала 2011 йылдан алып Башҡортостан Республикаһы Хөкүмәтенең ҡарарына ярашлы уҙғарыла килә. Еңеүселәр “Иң яҡшы дәүләт ветеринар учреждениеһы, лечебница, участка, пункт”, “Иң яҡшы етәксе”, “Иң яҡшы ветеринария лечебницаһы мөдире”, “Иң яҡшы ветеринария участкаһы мөдире”, “Иң яҡшы ветеринар-санитар экспертиза лабораторияһы мөдире”, “Иң яҡшы ветеринария дарыуханаһы мөдире”, “Иң яҡшы ветеринария табип-эпизоотологы”, “Иң яҡшы ветеринария фельдшеры”, “Иң яҡшы ветеринария диагностика лабораторияһы табибы”, “Иң яҡшы ветеринария лаборанты”, “Иң яҡшы бухгалтер” һәм “Иң яҡшы профойоштороусы” номинацияларында билдәләнеп бүләкләнде.
Бүләкләнеүселәр араһында райондаштарыбыҙ ҙа бар ине. “Иң яҡшы ветеринария фельдшеры” номинацияһында Яугилде ветеринар участкаһы лечебницаһының ветеринария фельдшеры Әҙһәм Рәхмәтуллин бүләкләнде. Уның был хеҙмәткә 32 йылдан ашыу ғүмерен бағышлауы, ярҙамсыл, үҙен юғары квалификациялы белгес һәм үҙ эшенең оҫтаһы итеп танытыуы, коллегалары һәм хайуандар хужалары араһында лайыҡлы абруй менән файҙаланыуы һыҙыҡ өҫтөнә алынды. “Ветеринария өлкәһендәге хеҙмәттәре өсөн” миҙалы менән район ветеринарияһында оҙаҡ йылдар намыҫлы хеҙмәт иткән ветеринария хеҙмәте ветераны Ғәлиә Хисамова бүләкләнде.
Шулай уҡ семинар сиктәрендә “Ветеринарияның киләсәге: картинала һанлы донъя” тип исемләнгән балалар араһындағы республика һүрәттәр конкурсына йомғаҡ яһалды. Конкурста 7-14 йәшлек балалар үҙ оҫталыҡтарын һынаны. Ойоштороусылар билдәләүенсә, конкурсҡа 120-нән ашыу һүрәт ҡабул ителгән. Еңеүселәр ике йәш төркөмөндә билдәләнгән. Районыбыҙҙың йәш рәссамы Гөлнәзирә Вахитованың эше 7-10 йәшлектәр араһындағы бәйгелә 1-се урын менән баһаланып, иҫтәлекле бүләккә лайыҡ булды.
Республика семинар-кәңәшмәһе эшлекле шарттарҙа үтте. Сараны ра-йон мәҙәниәт һарайы артистарының сығыштары биҙәне.
Район ветеринария станцияһы коллективы семинар-кәңәшмәне лайыҡлы үткәреп, үҙҙәренең һөнәри байрамын лайыҡлы ҡаршылай. Байрам уңайынан өр-яңы дезинфекциялау (ДУК) автомашинаһына эйә булдылар.
Район ветеринария станцияһы начальнигы Фаил Зәйнетдинов ветеринария коллективын, хеҙмәттәштәрен, тармаҡ ветерандарын һөнәри байрамдары – Ветеринария хеҙмәткәрҙәре көнө уңайынан тәбрикләп, хеҙмәт ҡаҙаныштары, иҫәнлек-һаулыҡ, именлек, эштәрендә уңыштар һәм байрамса кәйеф теләй.
Индира ИШКИНА әҙерләне.

“Ветеринария хеҙмәте беҙҙә бик көслө. Беҙ уға әүҙем ярҙам итәбеҙ – техникалар һатып алынды, лабораториялар йыһазландырылды. Һәм бындай эштең файҙаһы бар. Әгәр ҙә картаға ҡараһағыҙ, республикабыҙ тирәһендә АЧС, хайуандарҙың башҡа хәүефле ауырыуҙары таралыуы күҙәтелә. Беҙ әлегә хәлде һаҡлап ҡала алабыҙ. Ҡырағай йәнлектәрҙең ҡотороу осраҡтары була, әммә беҙ уларға оператив рәүештә йоғонто яһайбыҙ, шунда уҡ карантин индерәбеҙ һәм тейешле саралар күрәбеҙ. Былар барыһы ла - ветеринария хеҙмәтенең һөҙөмтәле эшмәкәрлеге һөҙөмтәһе”, - тине төбәк Башлығы Р.Хәбиров сығыштарының береһендә.