Яугирҙарға – щи һәм витаминлы салат

1 сентябрь – Белем көнөн Красноусол ауылы ағинәйҙәре бик файҙалы, үҙенсәлекле итеп үткәрҙеләр. Мәғариф ветераны, ағинәй, әүҙем йәмәғәтсе Рәмзиә Ғайса ҡыҙы менән Салауат Сәйегәрәй улы Монасиповтарҙың иркен йортона йыйылып,  файҙалы һәм туҡлыҡлы ризыҡ -  щи  һәм солянка  әҙерләнеләр. Был ризыҡтарҙы  әҙерләү өсөн  һәр кем кәрәкле йәшелсәләрҙе алып килде. Банкаларҙы ла бергәләп хәстәрләнек. Яугирҙарыбыҙ иҫән-һау йөрөп ҡайтһын, тип теләй-теләй, бергәләп ошо ризыҡтарҙы әҙерләргә булдыҡ.

Күмәкләп тотонғас эште тиҙ тамамланыҡ. Минзилә Сәйфетдин ҡыҙы илебеҙҙә тыныслыҡ урынлашып,  ил һағындағы ир-егеттәр, уландар ғаиләләре, балалары, атай-әсәйҙәре  иҫән-һау әйленәп ҡайтыуын теләп, ҡөрьән аяттары уҡыны.

Әйткәндәй, был изге эшкә башҡа ауыл ағинәйҙәре лә ҡушыласаҡ. Беҙҙең күстәнәстәр уларға өй йылыһын, яҡындарының, ауылдаштарының хәстәрен һәм сәләмдәрен алып барып еткерһен.

М.Собханғолова.