Ғафури районы имамдары һайлауға килде

 Юлыҡ ауыл мәҙәниәт йортонда урынлашҡан 1695-се һайлау участкаһында имам-мөхтәсиб Фәнил Басиров менән ошо ауыл имамы Салауат Юлыҡов гражданлыҡ бурысын үтәгән. Улар бындай мөһим ваҡиғаны бер ҡасан да ҡалдырмауҙарын әйтте.

- Ниңәлер, әгәр кеше иманлы икән, ул һайлауҙарҙы иғтибарһыҙ ҡалдыра, тип иҫәпләйҙәр. Юҡ! Һайлауҙар - ниндәй дин тотоуына ҡарамаҫтан, һәр гражданы өсөн үҙ гражданлыҡ позицияһын күрһәтеү һәм йәмғиәт үҫешенә үҙ өлөшөн индереү мөмкинлеге. Һайлауҙа ҡатнашыу һәр мосолмандың хоҡуғы ғына түгел, ә бурысы ла булып тора. Ислам күҙлегенән ҡарағанда, кеше социаль яҡтан әүҙем булырға, йәмғиәттә үҫеше өсөн борсолорға, уның бер өлөшө булырға тейеш. Был Башҡортостаныбыҙ, районыбыҙ тормошонда бик мөһим мәл, өҫтәүенә район һәм ҡайһы бер ауыл Советтарына депутаттар һайлайбыҙ. Бөгөн республикабыҙҙа һәм бөтә илдә төрлө милләт һәм конфессия вәкилдәре дуҫлыҡта һәм татыулыҡта йәшәй. Күп милләтле республикабыҙ халҡы бер ҡасан да булмағанса берҙәм. Һуғыш яланында, тылда һәм бына бөгөн һайлауҙарҙа, - тип билдәләне Фәнил хәҙрәт Басиров.

- Беҙ, дин әһелдәре, һәр ваҡыт илдең именлеге, лидерҙарыбыҙ һәм, әлбиттә, бөгөн махсус хәрби операция зонаһында булған яугирҙарыбыҙға улар иҫән-һау һәм еңеү менән ҡайтһын өсөн өсөн доға ҡылабыҙ. Шулай уҡ, көсөбөҙҙән килгәнсә, батыр яугирҙарыбыҙға гуманитар йөк оҙатыуҙа ярҙам итәбеҙ. Мөслимәләребеҙ маскировкалау селтәрҙәре үрә, гуманитар ылау әҙерләүҙә лә яҡындан ҡатнашабыҙ. Әйткәндәй, Салауат хәҙрәттең улы махсус хәрби операцияла илебеҙ һағында тора. Улыбыҙҙың иҫән-имен ҡайтыуын теләп доғалабыҙ, тине ул. Дин әһелдәре райондың йәмәғәт тормошонда һәр ваҡыт әүҙем ҡатнаша, сөнки проблемалар уртаҡ.