Ҡырмыҫҡалыла "Йәйге Шайморатов уйындары" финалы үтә

Ҡырмыҫҡалы ауылының физкультура-һауыҡтырыу комплексында үткән «Йәйге Шайморатов уйындары»н асыу тантанаһында балаларҙы Ҡырмыҫҡалы районы хакимиәте башлығы Әлфир Сабиров сәләмләне.

- Беҙҙең район бөгөн бөтә республиканы тиерлек - иң әүҙем, көслө, күренекле балаларҙы ҡабул итә. Ҡырмыҫҡалы ерендә, легендар генерал Миңлеғәле Шайморатовтың тыуған ерендә, «Йәйге Шайморатов уйындары»финалы үтә. Һеҙҙең алды етди һынауҙар тора. Барығыҙға ла уңыштар теләйем, - тине Әлфир Фәрхәт улы.

БР мәғариф министры урынбаҫары Әлфиә Ғәлиева һөйләүенсә, беҙҙең республикала 5000 шайморатовсы, мәктәптәрҙә 251 шайморатов класы иҫәпләнә.

- Был инде бишенсе "Йәйге Шайморатов уйындары". Улар 7 сентябрҙән 21 сентябргә тиклем үтә. Ете зона ярышында 181 команда ҡатнашты. Иң көслө 29 йыйылма команда Рәсәй Федерацияһы Геройы генерал-майор МИңлеғәле Шайморатов исемендәге кубок өсөн көрәшәсәк, - тип билдәләне Әлфиә Закир ҡыҙы.

Махсус хәрби операцияла ҡатнашыусы «Гарик» саҡырыулы яугир сараға саҡырыу өсөн рәхмәт белдерҙе.

- Үҙемдән генә түгел, махсус операцияла ҡатнашыусыларҙың барыһынан да һеҙҙе бында сәләмләргә теләйем. Илебеҙ геройҙарының иҫтәлеген ҡәҙерләгәнегеҙ өсөн барығыҙға ла рәхмәт. Республиканың төрлө төбәктәренән командалар күп. Һәм был беҙҙең берҙәм булыуыбыҙҙы иҫбатлай. Беҙ берҙәм булһаҡ, беҙҙе бер кем дә еңмәйәсәк, - тине хәрби.

Уйындарҙа ҡатнашыусыларға интеллектуаль викторина үтергә, республиканың спилс-картаһын йыйырға, стройҙа йөрөү һәм йыр смотрында, АК-74 автоматын йыйыуҙа һәм һүтеүҙә, традицион башҡорт йәйәһенән уҡ атыуҙа, оҙонлоҡҡа һикереүҙә  ярышырға тура киләсәк.

Ҡырмыҫҡалы районы «Йәйге Шайморатов уйындары» финалын үткәреү хоҡуғын юҡҡа ғына алманы. Былтыр Ҡырмыҫҡалы ауылы гимназияһының 5А класс командаһы ярыштарҙың абсолют чемпионы булды.

«Йәйге Шайморатов уйындары» финалын үткәреү өсөн майҙансыҡ булып физкультура-һауыҡтырыу комплексы, шулай уҡ Ҡырмыҫҡалы ауылының 2-се мәктәбе торҙо. Ул былтыр «Мәктәп мәғариф системаларын яңыртыу» федераль программаһы буйынса капиталь ремонттан һуң асылған. Мәктәп фойеһында Ҡырмыҫҡалы районының хәрби-патриотик клубтары күргәҙмәһе эшләй.

Ярыштар йомғаҡтары буйынса команда һәм шәхси беренселектәрҙә еңеүселәр һәм призерҙар билдәләнәсәк.