Тағы ла ҙурыраҡ еңеүҙәр теләйбеҙ!

Әйткәндәй, Айбулат “Беҙҙең Башҡортостан” төркөмөндә үткән ошондай уҡ конкурстың финалында ҡатнашҡайны. Һәм бында ла иң күп тауыш йыйып, республика кимәлендәге еңеүсе булды ул. Беренсе тапҡыр беренсе класҡа барғанда уҡ бер түгел ике тапҡыр еңеүсе булған Айбулатҡа артабан да уңыштар ғына теләйбеҙ.
Красноусолдан Нияз Мәжитов исемендәге башҡорт гимназия-интернатының 1-се класына уҡырға барған Тимур Вәлиев 486 тауыш йыйып, 3-сө урын алғайны. Ул да редакцияға әсәһе Таңсулпан Айҙар ҡыҙы менән килде. Айбулат кеүек үк Тимур ҙа баҫалҡы булып сыҡты. Мәктәптә уларҙы ҡыҙҙар менән ултыртыуҙары ла оҡшап етмәй икән. Икеһенең дә парта артында яҡын дуҫтары менән ултырғылары килә. Йәнә Тимур йүгерергә, баҫтырыш уйнарға ярата. Ә ҙурайғас... таксист булырға хыяллана. Хәйер, бала саҡта кем генә шофёр, машинист, лётчик йә булмаһа генерал булырға хыялланмай. Иң мөһиме, һаулыҡлы, тырыш, аҡыллы бала булһындар. Алда тағы ла ҙурыраҡ еңеүҙәр, ҡаҙаныштар көтһөн уларҙы.
М.Мәмәтҡолова.