“Ижадсылар планетаһы”

Сарала ҡатнашыусыларҙы сәләмләү өсөн һүҙ район хакимиәте башлығының эшҡыуарлыҡ үҫеше һәм инвестиция сәйәсәте буйынса урынбаҫары вазифаһын башҡарыусы Артур Ғафаровҡа бирелеп, ул был сараның Хәйриә маҡсатын да үҙ эсенә алыуын һыҙыҡ өҫтөнә алып, һатылған билеттарҙан килгән аҡса махсус хәрби операциялағы яҡташтарыбыҙға ярҙамға йүнәлтеләсәге хаҡында әйтеп үтте.
- Бөгөн мәҙәниәт һарайына килергә ваҡыт тапҡан һәр кемгә рәхмәтемде белдерәм. Һәр беребеҙ хәрби бурыстарын үтәгәндә Рәсәй армияһы хәрбиҙәре тәьмин иткән хәүефһеҙлек һәм яҡлауҙың ни тиклем мөһим булыуын яҡшы аңлай. Был концерт барыбыҙ өсөн дә рәхмәт һүҙҙәрен белдереү генә түгел, ә яугирҙарыбыҙға иң кәрәкле нәмәләр менән тәьмин итеүҙә ярҙам күрһәтеп, аныҡ өлөш индереү мөмкинлеге буласаҡ, - тип билдәләне Артур Вәсим улы. – Беҙҙең яҡташтарыбыҙға ышаныслы тыл кәрәк. Бөгөн илебеҙ еңел булмаған ваҡыттар кисерә. Әммә беҙ беләбеҙ: беҙҙә көслө кешеләр бар, һәм беҙ уларға ышанабыҙ.
Был районыбыҙҙың мәҙәниәт бүлеге көсө менән ойошторолған беренсе Хәйриә концерты түгел. Өлкәндәрҙең, балаларҙың, ғафуриҙарҙың өлкән быуынының, хеҙмәт коллективтарының ситтә ҡалмауы ҡыуаныслы. Район халҡы Ватаныбыҙҙы яҡлаған яҡташтарыбыҙға ярҙамға үҙ өлөшөн индерергә килде.
Был кисәлә тамашасыларҙы “Айгүзәл” халыҡ бейеүҙәре ансамбле (етәксеһе Эльвира Хөснөтдинова), “Төлкәҫ” өлгөлө халыҡ бейеүҙәре ансамбле (етәксеһе Айгөл Буранова), “Быҙыбыт” (Илшат Хәбибуллин) “Эксклюзив” (Ольга Кирдеева) өлгөлө хореография коллективтары төрлө бейеүҙәре менән һөйөндөрҙө. “Хәмзә” проекты етәксеһе Данир Мәсәлимов “Урал батыр” эпосынан өҙөктө йырлап-өзләп ишеттерҙе, Елена Рябова етәкселегендәге “Землячки” ветерандар халыҡ хоры, үҙәк район дауаханаһының ветеран медицина хеҙмәткәрҙәренең “Усолочка” (етәксеһе Елена Рябова) ансамбле патриотик йырҙар башҡарҙы. Тамашасылар ҡурайсыларҙың “Мағаш” халыҡ ансамбле, “Уҡлыҡая” ирҙәр халыҡ вокаль ансамбле, “Перевал” вокаль-инструменталь ансамбле һәм “Яңы тулҡын” республика вокаль конкурсы финалисы Мгер Аванесяндың сығыштарын көслө алҡыштарға күмде. “Ғафури” халыҡ драма театры артистары яҡташыбыҙ шағир, драматург Салауат Әбүзәровтың “Байраҡ аҫтында” спектакленән өҙөк тәҡдим итте.
Район мәҙәниәт һарайы ижади коллективтарының сығыштарынан торған бай йөкмәткеле концерт мәҙәниәт һарайының ҡатын-ҡыҙҙар вокаль ансамбле башҡарған “Бергә булайыҡ, берҙәм булайыҡ!” йыры менән тамамланды.
Сара һуңында уны алып барыусылар һатылған билеттарҙан 40 мең һум аҡса йыйылыуын иғлан итте һәм бар аҡса Ғафури районы Хәйриә фондына тапшырыласағын әйтеп үтте.
- Был кистә беҙҙең менән булғандарҙың барыһына ла рәхмәт! Йәнә бер тапҡыр барыһына ла баш өҫтөндә тыныс күк йөҙө, ныҡлы һаулыҡ һәм беҙҙең егеттәрҙең алғы һыҙыҡтан иҫән-һау ҡайтыуын теләйбеҙ. Тамашасыһыҙ артист булмағандай, ышаныслы тылһыҙ ҙа ҡыйыу фронт юҡ. Беҙ бергә - көс! - алып барыусылар Фәрүәз Урманшин һәм Альбина Ишкина тамашасылар менән ошондай теләктә хушлашты.
Ике сәғәткә яҡын барған концерт бер һулышта үтте. Красноусол ауылының мәҙәниәт һарайында сираттағы ижади миҙгел шулай сағыу асылды. Халыҡ сағыу сығыштарҙы тамаша ҡылыуҙан кинәнес һәм ял алып ҡына ҡалманы, ә МХО-лағы яҡташтарыбыҙға ярҙамға үҙ өлөшөн индереүҙән ҡәнәғәт ҡалды.