Аҡыллы ла, уңған да, һөйкөмлө лә улар

Уларҙың сығыштарына баһа бирәсәк жюри менән танышҡас, ҡатнашыусылар конкурстың – “Һаумы, был – мин!” тип аталған тәүге этабын үтте. Бәйге башланырҙан алда һалынған йәрәбә буйынса тамашасылар алдына сығыш яһарға иң тәүгеләрҙән булып Ксения Подомарёва сыҡты. Ҡыҙ үҙе менән таныштырып, Красноусолдағы 1-се урта мәктәптең 9-сы класында уҡыуын, “Десант” хәрби-патриотик клубы ағзаһы булып тороуы, өс тапҡыр Карелияға һәм Санкт-Петербургҡа эҙләнеү-ҡаҙыныу эштәренә барып ҡайтыуы, ирекмән булыуы хаҡында һөйләп үтте.
Сираттағы конкурсантка Розалина Ғәлина – ошо уҡ мәктәптән һәм 9-сы класта уҡый. Ҡул эштәре оҫтаһы, матурлыҡты күрә белә һәм уны булдырыуға һәләтле. Ул сығыш яһарға үҙенең оҫта ҡулдары менән әҙерләгән биҙәүестәрен тағып сыҡты.
Айлина Дәүләтбаева үҙе менән шиғыр аша таныштырҙы. Ул да ҡыҙҙарҙың тиҫтере, Н.А.Мәжитов исемендәге Красноусол башҡорт гимназия-интернаты уҡыусыһы.
Арина Смышляева гитарала уйнарға, музыка тыңларға ярата, спорт менән мауыға, буш ваҡыты булдымы тәмле ризыҡтар бешерә. Ул да 1-се мәктәптең 9-сы класынан.
Бишенсе конкурсантка Диана Ваһапованың сығышынан уның Красноусолдағы 2-се урта мәктәптең 9-сы класында уҡыуы хаҡында билдәле булды, ул күңел асырға, аралашырға ярата, театр түңәрәгенә йөрөй.
Алдағы конкурсанткаларҙың тиҫтере – алтынсы һан аҫтында сығыш яһаған Еҙем-Ҡарандан Карина Садиҡова һәр эштә әүҙем йәмәғәтсе, уҡыуҙа ла алдынғы һәм йорт эштәрен яратып башҡара, шулай уҡ тәмле итеп бешеренә, китаптар уҡый.
Икенсе һынауҙа бәйгеселәр жюри хөкөмөнә өйгә эштәрен – көҙ темаһына әҙерләнгән композицияларын йәки ҙә булмаһа блюдоларын тәҡдим итте. Ксения тамашасылар алдына көҙ айҙарын сағылдырыусы өс сәскә менән сыҡты. Розалина үҙ ҡулдары менән әҙерләгән биҙәүестәре, Айлина көҙгө муллыҡтан тулы кәрзин һәм еләк бәлеше, ағас еләгенән перәниктәр һәм башҡа тәм-томдарҙан торған ҙур тәрилкә, Арина үҙе бешергән печеньелары, Диана төрлө эслекле булочкалар һәм ҡабаҡ формаһындағы тәм-томдар, Карина көҙгө салат һалынған матур ваза тотоп сыҡты.
Ҡыҙҙар конкурстың өсөнсө һынауы – “Байрам күлдәктәрендә дефиле”гә әҙерләнгән арала кисәне алып барыусылар тамашасылар һәм ҡыҙҙарға, “ауырырға” килгән үҫмерҙәр өсөн конкурс ойошторҙо. Унда Еҙем-Ҡаран мәктәбе уҡыусылары әүҙем булды.
Бына матур күлдәктәрен кейгән ҡыҙҙар махсус әҙерләнелгән подиум буйлап конкурстың сираттағы этабы - “Дефиле”гә сыҡты. Ксения көрән төҫтәге күлдәктә, Розалина менән Арина – ҡара, Айлина ысын көҙ королеваһы кеүек алтын төҫлө күлдәктә һәм ҡулына сәскәләр тотоп, Диана сәскәле һәм япраҡлы ағас кеүек, Карина ҡулына сәскәләр тотоп һәм сәскәләр менән биҙәлгән күлдәктә ине. Был этапҡа өҫтәп ҡыҙҙар шарф (яулыҡ, косынка) һайлап алып, күлдәктәрен тулыландырырға тейеш булды. Ҡыҙҙар үҙ образдарын матур итеп байытты.
Бишенсе этапта иһә ҡыҙҙар үҙҙәрен артист сифатында ниндәй ҙә булһа жанр аша күрһәтергә тейеш булды. Бәйгеселәр шиғыр ҙа һөйләне, бейене лә, йырланылар ҙа, гитарала ла уйнап, үҙҙәренең һәләттәрен төрлө яҡлап күрһәтте. Жюри конкурсҡа йомғаҡ яһағансы алып барыусы интеллектуаль конкурс та ойошторҙо.
Бына, ниһайәт, бәйгенең һөҙөмтәһе билдәле булды. Төрлө номинацияларҙа еңеүселәр: үҙенең тәрән белеме һәм интеллектуаль характерҙағы һорауҙарға сағыу яуаптары менән барыһын да таң ҡалдырған Розалина Ғәлина – “Мисс - Интеллект”, үҙенең нәфис зауығы һәм камил стиле менән бөтәһен дә әсир иткән Карина Садиҡова “Мисс - Элегантлыҡ” титулдарына эйә булды. Уның һомғоллоғо, кейеме һәм аксессуарҙар ярҙамында үҙенең индивидуаллеген һыҙыҡ өҫтөнә алыу һәләте бер кемде лә битараф ҡалдырманы. Ксения Подомарёва - “Мисс - Һөйкөмлөлөк” - тамашасыларҙың һәм жюриҙың һөйөүен үҙенең харизмаһы, йөҙөнән китмәгән йылмайыуы менән яулай, Диана Ваһапова – “Мисс – Артислыҡ” - күрһәткән ижади сығышы ваҡытында артис-тизм һәм талант, Арина Смышляева – “Мисс – Оригиналлек” - конкурс этаптарын үткәндә стандарт булмаған фекерләү һәм креатив ҡараш күрһәтә. Һәр конкурсант ошондай комментарийҙар менән бүләкләнде. Ә "Көҙ батшабикәһе" титулын Айлина Дәүләтбаева яуланы. Уға шулай уҡ Мария Тамояндың 2000 һумлыҡ сертификаты тапшырылды. Конкурста ҡатнашыусыларҙың барыһы ла “Форсат” йәштәр үҙәгенең Дипломдарын һәм бүләктәрен алып, ҙур ҡыуаныс кисерҙе. Конкурс йәштәр тормошонда сағыу ваҡиғаға әйләнеп, бөтәһенә лә сағыу хәтирәләр һәм ыңғай тәьҫораттар ҡалдырҙы. Ул диджей Maratsensei ойошторған дәртле дискотека менән тамамланды.
- Конкурсыбыҙҙы шундай сағыу һәм иҫтә ҡалырлыҡ иткән һәр кемгә ихлас рәхмәт белдерәбеҙ. Алып барыусы Кристина Басареева-Быковаға айырыуса рәхмәтлебеҙ, уның ялҡынлы энергияһы һәм оҫталығы байрамдың ҡабатланмаҫ мөхитен тыуҙырҙы. Ҡатнашыусыларҙы әҙерләүгә күп көс һалған мәктәп етәкселегенә һәм уҡытыусыларына ҙур рәхмәтлебеҙ һәм сарала Еҙем-Ҡаран мәктәбе уҡыусыларының ҡатнашыуы өсөн етәкселеккә айырым рәхмәтебеҙҙе белдерәбеҙ. Ҡатнашыусыларҙы ғәҙел баһалағандары һәм финанс ярҙамы өсөн жюри ағзаларына – конкурс бағыусыларына рәхмәтлебеҙ (Маша визажист-Мария Тамоян матурлыҡ салонында үҙенең һайлауы буйынса косметик процедураларға 2 мең һумлыҡ сертификат, ә тәжрибәле маникюр оҫтаһы Дарья Андреевна Тростина, конкурс бағыусыһы һәм шулай уҡ жюри ағзаһы - һәр ҡатнашыусыны үҙенең студияһында хеҙмәттәргә 500 һумлыҡ сертификаттар менән бүләкләне. Шулай уҡ диджей Марат Аҡбаровҡа ла рәхмәт әйтәбеҙ. Ғөмүмән, барыһына ла рәхмәт, - тигән теләктә ҡалды “Форсат” йәштәр үҙәге директоры Рәшиҙә Килмөхәмәтова.