Район хакимиәте халыҡ менән осрашыуҙар уҙғара

Халыҡ менән осрашыуҙа район хакимиәте башлығы Венер Вахитов һәм уның урынбаҫарҙары, район Советы секретары Марсель Йәнмырҙин, Үҙәк район дауаханаһының баш табибы Хәкимйән Сәфәрғолов, “Ватанды һаҡлаусылар” фондынан Рәмзиә Юлмөхәмәтова, “Эко-Сити” ойошмаһы вәкиле ҡатнашты.
Бельский һәм Табын ауыл биләмәләре башлыҡтары Юнир Әхмәров менән Фидан Ғүмәров халыҡты эштәр торошо менән таныштырҙы, киләсәк пландар менән уртаҡлашты. Ә халыҡ, үҙ сиратында, ҡыҙыҡһындырған һорауҙарын бирҙе, проблемалар тураһында һөйләне. Ауыл халҡы мәле тура килгәндә яңы район башлығына һорау-теләктәрен әйтеп ҡалырға тырышты, бәлки, әллә ҡасандан бирле һөйрәлеп килгән ҡайһы бер мәсьәләләр сиселер, тигән өмөт ҙур уларҙа.